Tumau om gas lobi RM17,000 nahau PPM
KUDAT: Tinimungan Pulis marin (PPM) watas diti nakaanu pinapakakung do ponginaman sontimungan modidikot aiso kasagaan (PTI) mogohimu mogowit lumabus tumau om gas ih kigatang lobi RM7,000.
Boyoon Pulis Watas Kudat Superintendan Douglas Taong minoboros do pinamahauan dilo winonsoi maya operasi ih pinapanau id kawaigan Kampung Bingolon Laut hiti.
Tumanud dau, kiginumu 20 PTI tinaan songowian barang-barang nagamu id suang iso bot monginsada kawo magapon kiikira jam 7 dongotuong tadau Koonom.
“Suai bot dino nokomoi, nahau nogi kiginumu 24 tong tumau petrol kiginumu 200 liter, 16 gelen tumau petrol kiginumu 30 liter, om 24 tong gas jenama My Gas.
“Anggaran gatang koinsasanai pinamahauan kiginumu RM117,486.40,” ka dau id suang kopoilaan hiti konihab.
Minoboros isio do id kinantakan dilo, tolu kusai nakaanu minogidu miampai tuminuhun mantad bot dino nokomoi pogului natagak id bogian talun songindoros.
Kakaal poh bogian dau monoriuk kointutunan kotolu-tolu ‘suspek’ dino nokomoi om gisom baino aiso poh kinagakaman winonsoi.
“Asil pinonoriukan timpuuni nokoilo do barang-barang tamangan dino nokomoi owiton daa lumabus doid Pulau Palawan Filipina.
“Koinsanai PTI dino nokomoi kiumur id bindurugan sontoun gisom 75 toun om monondos nokorikot mantad Kota Kinabalu om Kota Belud.
“Kigaat iyolo gumuli doid Pulau Palawan miampai minomoguo do bot onginsada dilo,” ka dau.
Minoboros ih Douglas do laang montok mongilo sanagnu bot dilo kakaal papanaon om kes dino soriukon tumanud Seksyen 21 Akta Kawalan Bekalan 1961 om Seksyen 6 (1) (c) Akta Imigresen 1959/63.