PBS popoingkakat voos kavavagu ontok PRU14
PENAMPANG: Paati Psiompuuvan Sabah (PBS) popokito do kosuvazan miampai popoingkakat piipio voos kavaavgu id nuhudan kopoingkakatan ih monokisaap id Pomihian Tagazo Ginumuan Ko-14 (PRU14).
Kumoduvo Polosiden PBS Datuk Seri Dr Maximus Ongkili minoboos do ngaan atagon nuhudan poingkakaton nokosogu no doid Polosiden om Poniikon Barisan Nasional (BN).
“Ngaan ngavi atagon poingkakaton PBS nakataak no doid Huguan Montili Datuk Seri Mohd Najib Tun Razak om Vozoon Montili Sabah Tan Sri Musa Haji Aman.
“Ingkuo po nga ajangka dagai do kivaa dati piipio voos vagu id nuhudan touvi no,” ka disido kahapas Pinitimbungakan Tinan Takavas PBS ih pinoniikon di Polosiden Tan Sri Joseph Pairin Kitingan, doiti di tadau Kaapat.
Montili Vinakas, Teknologi Otomou om Vaig minoboos do tinan pomihian tagazo montok saavi-avi 13 tiikon Hamin Koundangan Pogun (DUN) om himo tiikon Parlimen nokosodia no tumoguvang do PRU ih pisosoomo papanaon ontok songian timpu noopo.
“Popouhan dati ‘Trial Run’ montok mintong koposodiaan injin tokou. Otumbazaan tokou miampai toinsanan kalaja opoi, laang ouhud om pisokodungan mantad toinsanan parti pikouvangan BN, ahantoi tokou saavi-avi tiikon ih pinoobi montok PBS,” ka disido.
Minoboos Maximus do id boogizan suvai id nombo PBS au monongkibai, suu’von izioho montok monuidong hongkod papanau kapaagatan montok monuhung calon parti pikouvangan BN ih suvai montok mamahantoi tiikon piboi’an.