Tumilombus porinta popoburu gana balajaran id Sabah: Najib
SEPANGGAR: Tumilombus porinta popoingkawas do karaja om ‘komitmen’ montok papatantu do kaganaan balajaran id Sabah kotilombus koburu, ka di Luguan Montiri Datuk Seri Najib Tun Razak.
Minoboros isio do laang om karaja montok popoburu do kaganaan balajaran kiguno kopio montok papatantu do rayat Sabah kikosiwatan montok popoingkawas do kobulihan tinan dumimpot doid rontob poingkakawas.
“Onu ih wonsoyon do porinta ontok timpu diti nopo nga montok tumilombus popoingkawas do koburuon kaganaan balajaran om popoindalan pambalajaran om koponudukan.
Ilo nogi miampai mogipapangaan ponokotanda kumaa rayat do Koporintaan Barisan Nasional (BN) ‘komited’ kopio montok popotounda do sikul ngawi nakalaid om nagraraag kumaa sikulan di lobi doung kawawagu okon noopo mantad kawo linominon nga poposuang do kounalan ngawi miagal ‘bilik darjah abad ke-21’,” ka dau.
Noboros disio ahal dilo kuminaa monunurat abar kalapas pinapaharo do kakapan karaja id Sikul Pintangaan Kabansaan (SMK) Pekan Telipok, doros hiti koihab.
Nakaampai nogi id kakapan dilo, ih Boyoon Montiri Sabah Tan Sri Musa Aman, Montiri Balajaran Datuk Seri Mahdzir Khalid, Montiri id Koupisan Luguan Montiri Datuk Seri Abdul Rahman Dahlan, om Montiri Sains, Teknologi om Inovasi Datuk Seri Wilfred Madius Tangau.
Minoboros ih Najib do ralan tonudon montok momonsoi SMK om SK Pekan Telipok id iso tiyonon di iso’i nopo nga osonong kopio.
“Goduwo-duwo sikul kaanu miampu mogisusuai kounalan miagal padang,” ka dau.
Ka dau SMK Pekan Telipok koponolon balanja pamansaian kiginumu RM31 riong, om SK Pekan Telipok kopohompit do kos pamansaian kiginumu RM18 riong.
SK Pekan Telipok om SMK Pekan Telipok pogului diti papanau kotorinaan id linominon laid kiikira duwo kilometer mantad tampat kawawagu id koyuon linominon di naraag.
Linominon wagu ih tinimpuunan minomonsoi mantad podi 2009 dilo pogului diti nokoluntan sabap kobolingkangan ‘teknikal’ om noputan kawagu kinapamansaian dilo ontok 2013 om opongo ontok toun diti.
Linominon wagu ih popoiyon do 837 susumikul om 58 mongingia SMK om 704 susumikul om 43 mongingia SK dilo tuminimpuun pinapanau kotorinaan ontok 20 Februari nakatalib. -Bernama