Karaja popoinggayo om momonsoi kawagu 120 sikulan naraag nokotimpuun noh
SIPITANG: Karaja popoinggayo om momonsoi kawagu 120 tinan sikul nangaraag id pogun diti notimpuunan noh maya poruntukan poimbida mantad Bajet 2018 ih pinoboros di Luguan Montiri Datuk Seri Najib Tun Razak di toun nakatalib.
Montiri Balajaran M Datuk Seri Mahdzir Khalid minoboros do mantad ginumu dilo, kiginumu 83 tinan sikulan torinaon do Komontirian Balajaran Malaysia (KPM) om lobi dilo kiharo id suriba ponorinaan Koupisan Talun Alun (JKR) Sabah.
“Montok pakej 1A, 83 tinan sikulan id suriba KPM nakalabus noh kuminaa kuntirikto duwo minggu nakatalib, om 37 tinan sikulan kagu maan wonsoyo di kuntirtikto ih linantik JKR.
“Kiginumu RM2.5 bilion pinosodia do porinta montok tujuan diti ilo nopo nga RM1 bilion poobion montok Sabah om RM1 bilion kagu poobion montok Sarawak, om RM500 riong id Semenanjung,” ka disio.
Noboros disio ahal dilo ontok romuto do monunurat abar kalapas pinotimpuun do Abaabayan Kapanahakan Toluod kumaa Koisaan Molohing om Mongingia (PIBG) Parlimen Sipitang id Dewan Serbaguna Sipitang, di tadau Kaapat.
Nokotindapou nogi ih Puru Parlimen Sipitang, Datuk Sapawi Ahmad, Panakadai Montiri Ponombuluian, Koubasanan om Kinoiyonon Posorili, Datuk Kamarlin Ombi, Potunud Koupisan Balajaran Sabah, Datuk Maimunah Suhaibol om Upisor Balajaran Watas Sipitang, Razak Karim.
Id ramai dilo pinapatahak nogi ih Mahdzir do sakadai RM283,000 toluod Parlimen Sipitang kuminaa PIBG id 83 tinan sikulan id pointongkod watas diti.
Pogului dilo, Mahdzir id pason dau nogi pinopoboros do poruntukan poimbida montok momonsoi wagu Sikul Pintangaan Kabansaan (SMK) Pangiran Omar miampai kos RM61 riong ih torinaon id suriba JKR Sabah.
Pinoboros ogi disio o poruntukan id suriba Tabung Poimbida balajaran kiginumu RM640,000 montok popoinggayo om monginsonong kawagu 21 tinan sikulan id watas diti.
“Asaga oku nogi kapanahakan poruntukan RM300,000 montok kopongobian nunu noopo abaabayan kotundaan balajaran id watas diti kumaa Parlimen Sipitang ih misokodung miampai PPD,” ka disio.