Porinta minamarayou YBR monulung rayat koburu id balajaran - Salleh

KOTA BELUD: Porinta minamarayou karaja Yayasan Bank Rakyat (YBR) montok monulung rayat, doulu noh tinimungan di okurang kamampuan, montok koburu id suang balajaran.

Montiri Komunikasi om Multimedia Datuk Seri Dr Salleh Said Keruak minoboros do laang yayasan dilo kaanu monulung porinta ih minggisom momonsoi ‘ekosistem’ pambalajaran abad ko-21 montok papatantu do gaab Falsafah Balajaran Kabansan osigampot.

“Nokosuang tokou noh tongus rontob koduwo Palan Kotundaan Balajaran Malaysia (PPPM) miampai gaab om imanimanon montok tumilombus minggisom popoingkawas do kosonongon balajaran.

“Idsuang ahal diti, koposilihan susumikul mositi intongan miampai ‘holistik’ om koinsasanai mantad kawo ‘akademik’, ‘sahsiah’, ‘kokurikulum’ om sipoot,” ka disio id abaabayan YBR hiti konihab.

Salleh ih nogi puru Lamin Koundangan Pogun Usukan, minoboros do porinta toririmo poposotol do kogunoon balajaran om nakapaharo noh mogisusuai laang tosonong montok papatantu rayat haro ‘akses’ kumaa balajaran.

“Nung gulu poh, awagatan molohing miampai yuran mositi baraian. Nga baino, koinsanai yuran diti pinotingkod.

“Suai ko ilo, pagalasan buuk teks nopo nga patahakon tumanud rontob konuonuan molohing. Baino, ilo patahakon kumaa toinsanan susumikul,” ka Salleh.

Minoboros isio do poposodia nogi porinta do Sakadai Poimbida Kotimpuunon Koposikulan 1Malaysia kiginumu RM100 ih ginuno do 3.2 riong susumikul.

Tumanud Salleh balanja ngawi balajaran Malaysia nopo nga induwo kogumu piagalon kabalanja pogun ASEAN suai, nga porinta nakabalanja purata RM8,900 potitikid susumikul sontoun.

Iti ponokotanda do porinta baino ilo nopo nga Barisan Nasional maganu kawagatan kaganaan balajaran montok rayat Malaysia, sundung pia kiharo pomusarahan tarat mantad bogian pointantu ih toririmo minsingkiwal karaja tosonong porinta montok monulung rayat,” ka disio.

Tumanud Salleh, kounalan ih pinosodia do porinta nopo nga asil kaandangan pulitik ih popomilo do porinta popotilombus do agenda popotounda om popoburu pogun.

“Om, alansan kopio tokou kopongoputan diti potilombuso ontok timpu rumikot...BN noh ih obuli popouhan dilo,” ka dau.

Id abaabaayn dilo, kiginumu 250 susumikul id Parlimen Kota Belud nokotorimo sakadai RM100 om kantung sikul mantad YBR.

Kiginumu 10 tulun nogi nopili montok ruminamit sakadai ‘Tuisyen Rakyat’ kiginumu RM1,440 montok potitikid sikul.

Nokotindapou nogi ih Ponorikohon YBR Tan Sri Shukry Mohd Salleh.-Bernama

SALLEH (tanga) songowian mongingia ngawi om susumikul ngawi id abaabayan kapanahakan sakadai koposikulan om abaabayan ‘Tuisyen Rakyat’ id Dewan Masyarakat Tun Said Kota Belud konihab. Gambar wanan, Salleh pinapatahak do sakadai koposikulan om abaabayan...