Monokodung gugumaga au asalasai kobolingkangan
# Koporintaan BN noh ih kaanu papanau kotundaan montok kolumaagan rayat - Ronald
BELURAN: Monokodung gugumaga okon panalasaian kumaa kobolingkangan kotundaan id labus kakadaian, ka di Puru Parlimen Beluran Datuk Seri Dr Ronald Kiandee.
Ilo sabap, koporintaan Barisan Nasional (BN) noh ih kaanu papanau do kotundaan montok kolumaagan rayat pogun diti.
“Mongundi gugumaga noopo sabaagi opurimanan au kosontob au koponguntung.
“Kobolingkangan kapanahakan waig om lotirik, talun alun, sikulan om klinik au doti asalasai nung songowian gugumaga,” ka disio id Abaabayan Moginakan Rayat id Kampung Simpangan id Paitan di tadau Koonom.
Kiikira 600 tulun nokotindapou minamaramai do moginakan rayat dilo.
Ronald ih nogi Kumoduwo Yang Dipertua Dewan Rakyat minoboros do nosiliu noh koubasanan ontok orikot timpu pomilian tagayo, mamajani o gugumaga do nunu noopo montok kapaganu undi nga, kotutukon ‘janji’ irad dilo tantu noh do au kaanu popotopot.
“Mimang gaab diolo (gugumaga) montok popompuong rayat miampai nunu noopo ‘janji’ kotundaan. Mantad dilo, rayat au apatut do oimbayatan miampai batos/janji om ponombirangan gugumaga,” ka dau.
Minoboros isio do ih otopot kopio, tumilombus o koporintaan BN minggisom kumaraja montok rayat.
Ka dau ‘komitmen’ dilo pinokito hinonggo montok Kakadaian Watas Tokoodo Paitan noopo, lobi RM4 riong nakatahak noh porinta maya Upis Parlimen Beluran montok toun diti.
Tumanud dau kotundaan dilo kaamung noh pamansaian dewan, jambatan gantung, monorina monginsonong talun alun, momonsoi lamin koubasanan om ralan kabun.
Suai ko ilo, monginsonong sikulan, pinomoruhangan kounalan ‘solar hibrid’ om kapanahakan waig nogi ogumu nokosurat maya komontirian om agensi porinta montok pouhanon toun diti.
Minanahak ih Ronald pomitanan, ralan Mesej Tabatu id Longkod Watas Mongundi Simpangan kisinodu 7 kilometer kigatang RM19 riong maan papanao porinta toun diti kalapas asalasai popoindalan tender.
Id suang ahal dilo, pokionuon disio tuh pongundi id Parlimen Beluran tumilombus manahak sokodung poimponu kumaa calon-calon BN.
Ilo sabap ka disio, BN otopot kopio iso porinta di ‘prihatin’ om toririmo moningolig rayat labus kakadaian.
“Laang porinta montok popolumaag rayat baino nopurimanan do mogigion labus kakadaian kaamung id Parlimen Beluran,” ka disio.
Nokotindapou nogi ih Boyoon Koonduan Umno Beluran Endang Datu Asibi om Boyoon Komulakan Umno Beluran Samad Jambri.