SMPO Sipitang kiharo linominon wagu au noh alaid
SIPITANG: Sikul Pintangaan Pengiran Omar (SMPO) Sipitang kiharo linominon wagu au noh alaid ih kapanahak doti do kapasanangan kumaa mongingia om susumikul ngawi.
Ilo sumusuhut kinookunan porinta minomogonop do kopokionuon ih pinoboros mantad podi duwo toun nakatalib, momonsoi linominon wagu nangku toiko popoinggayo linominon posodia haro.
SMPO nopo nga iso mantad sikulan pointutuo id Sipitang. Watas diti haro walu sikulan pintangaan kaamung iso sikulan vokasional.
Puru Parlimen Sipitang Datuk Sapawi Ahmadminoboros do projik kotundaan kounalan SPMO dilo pininggisaman do Komontirian Balajaran om koponguhanan dilo papanaon maya Koupisan Talun Alun (JKR).
“Projik momonsoi sikulan SMPO diti nookunan noh di Komontirian Balajaran om kinoilaan do nabahagi noh kumaa JKR ih papalabus do kopoindalanan tender ontok soira-ira timu noopo,” ka disio mikuo alansan kopio tuh koponguhanan dilo kaanu popotimpuun toun diti.
Minanahak boboroson pinotimpuun do miting tagayo tounan Koisaan Molohing om Mongingia (PIBG) SMPO hiti, Sapawi ih nogi Potunud Yayasan Sabah minoboros do koponguhanan projik dino nokomoi nopo nga wookon pinggisaman porinta montok papawakas do ahal balajaran.
Ka disio, ogumu sikulan id Sipitang nakaanu noh asil abaabayan porinta, om nogi koponulung karaja montok poposoribau do tulun kiguno montok tumungkus do kopomuruanan pogun ontok timpu tabantalan.
Kokomoi SMPO, narayou di Sapawi kinodimpotan kinangaian tosonong akademik om kokurikulum sikulan dilo ih kotilombus koingkawas mantad sontoun doid sontoun.
Minoboros isio do projik momonsoi SMPO dilo osiliu doti iso tanda kotundaan sikul ih koposindak sunduan mongingia om susumikul diolo montok lobi kinangaian tosonong, om nogi osiliu ‘role model’ kotundaan sikul ngawi id Sabah.