Manifesto Pakatan Harapan okitonan ‘populis’ kituduvan popoompuvong layat - Yahya

PUTATAN: Kumoduvo Vozoon Montili Sabah Datuk Seri Yahya Hussin minoboos do menifesto Pakatan Harapan (PH) ih pinoimagon di kavavagu hobi okitonan ‘populis’ kituduvan popoompuvong layat.

Ka disido manisfesto dino okon noopo au otopot om au kosudong katapi nogi au toimoon layat Malaysia ih tantu do koiho papatantu ih tavasi kozo montok pogun.

“Sabaagi suntu, mimang izioho momunso Sukai Balang om Kotoinaan (GST). Iti iso ponginaman ih popoompuvong layat...id nombo mimang tokou kaanu konuonuan tagazo montok monuhung tokou momolinta pogun? Pinomu’uvan GST diti poguhuion tokou doid layat nogi.

“Ogumu dandi dosido dino idsuang manifesto okitonan ‘populis, nga momonsoi tuhun aanangan (mokinongou) nga au kaanu popouhan. Miaga do mamadandi do paa katapi kavait...osoou ku, layat au asanang ompuvongon. Layat Malaysia layat ih apandai, sanda-daau kivaa toihahaan montok mongiho do kosudong naku toisoiso ahal dino kosudong toi au,” ka disido.

Yahya ih nogi Monunuat Pituubungan UMNO Sabah minoboos ahal dino doid monunuat abal kahapas pinotimpuun do Abaabazan Popohumaag do Tinimungan Monginsada Uvang Putatan 2018 doiti koniab. Nokotindapou nogi ih Potunud Koupisan Ponginsadaan Sabah Dr Ahemad Sade.

Ka disido iti misuvai miampai Barisan Nasional (BN) ih au mamadandi do nuununu kumaa layat nung parti dino au kaanu popouhan.

Om nogi ka Yahya manifesto BN lobi kopoompit koinsasanai ‘spesifik’ sabap suvai ko kivaa manifesto nasional, BN nogi haro manifesto nazatan pogun, parlimen om Hamin Koundangan Pogun.

Kokomoi manifesto BN ontok pomihian tagazo ginumuan ko-13, noboos di Yahya do kogumuan dino nokouhan no om masaon gunoon layat om ih suai masaon id koponguhanan om maan pouhano.

Sabaagi suntu ka disido panadaan ‘infrastruktur’ kiguno miagal talun alun kaamung no projik Lebuhraya Pan Borneo, masaon om id koponguhanan.

Id abaabazan dino pinapataak Yahya do elaun koposizon kumaa hobi 900 monginsada suvai ko pinopoimagon nogi do projik pinopoinsiibo vatu nomitanan om kapanaakan sakadai doid paganakan monginsada ih nokotoguvang kaantakan talaat om kinantakan talaat kinoizonon. -Bernama

Yahya pinapataak do ‘replika cek’ balazan Sakadai Elaun Koposizon Monginsada kihoogo RM301,958 kumaa Poniikon Koisaan Monginsada Boogizan Kota Kinabalu Datuk Haji Arsit Sedi (vanan) id abaabazan dii.

Yahya monoimo tanda kaandaman mantad Ahemad (duvo mantad gibang) id abaabazan dii.