Koponguhanan RCP id Lahan Kalabakan koimpupuson vuhan diti - Esscom

SANDAKAN: Koponguhanan hongkod pomolisaan tinda toi ‘Road Check Point’ (RCP) maan potimpuuno ontok koimpupuson vuhan diti id Lahan Kalabakan Tawau montok popoingkavas do haang mangantob kapaagatan talaat id kohisaon pogun diti.

Komander Boogizan Koumohigan Poimbida Papak Kohisaon Sabah (Esscom) DCP Datuk Hazani Ghazali minoboos do kahapas dino, pouhanon dati RCP id Lahan Telupid id Telupid.

Ka disido pinomihian goduvo-duvo tiizonon koponguhanan RCP miampai atatap sumusuut lahan dino nadadi popionit tagazo piahatan boogizan kohisaon om boogizan kotonobon pogun diti.

“Ontok timpu iso’i, katanud miampai hanag popoingkavas do kapadtamangan koumohigan id boogizan Zon Oumohig Kohisaon Sabah (Esszone), masaon nogi boogizan dagai monoizuk kinoponuidongan ‘pos’ kapadtamangan di kavavagu,” ka disido ontok timpu ‘dialog’ kopinamot Abaabazan Makan Sodop Esscom songovian Media doiti, sodop koniab.

Ka disido ponoizukan tinoodo montok mongiho asil pinonuidongan ‘pos’ kapadtamangan kavavagu dino id piipio boogizan ih noihaan poguhui posoguon doid boogizan savat.

Tumanud disido iho nogi kopoompit do tonggungan monuhung Esscom papahabus abal ih tototopot tu au kopomiumbak do ponoizukan di papanaon.

Ka disido abal ih posohimbaan mositi tumanud kopoihaan pinahabus om mositi kapaganu do kapatantuan totopot mantad boogizan dosido.

Minanaak isido suntu kinantakan tohu tuhun talaat binadi noduso id Kalabakan ontok 27 Februari nakatahib, kivaa luputan media minoboos do ‘identiti suspek’, sabap kinopointahangan dino, ponoizukan om operasi sumusuut kes dino nantaban.

“Aiso binoos ku isai ‘suspek’ sabap ponoizukan kes dino au nopupusan doiho. Mositi iumon tokou ‘koncokonco’ ih nokoompit kahapas dino,” ka disido. -Bernama