Iso blok linominon kayu SK Nunuk Ragang nopunso id kinotutudan
RANAU: Iso blok linominon kayu Sikul Kabansaan (SK) Nunuk Ragang hiti pinoruput do nopunso id kinotutudan kiikira jam 4.10 sosodopon konihab.
Boyoon Balai Bomba om Mongumolig (BBP) Ranau Jimmy Lagung minoboros do nokotorimo o bogian dau do pamalahauan kaagaban kokomoi kinantakan dilo id jam 4.13 sosodopon om minoi hilo songowian siam puru id tampat kinantakan.
“Kinotutudan kopohompit do blok kayu linominon iso louting ih pinopoiyon do iso linimput balajar toun iso om upis ponorinaan sikul, linimput molohingon sikul, ponulung wanan, linimput mongingia om linimput pitimbungakan.
“Kinotutudan ih nokotimpuun noh id suang timpu alaid au nakaanu minomungolig do linominon dilo om bogian bomba poingkuro poh nga pinapanau karaja kopomisokan tapui montok mongilag tapui karalad doid lobi alaab,” ka dau.
Tumanud dau kinotutudan nakaanu minanamong sitanga jam kalapas dilo om aiso munggui pinoruput do nosindualan id kinantakan diti.
Kawagu dau, natadon kinantakan kakaal id ponoriukan do tinimungan forensik.
Namot dilo, Potunud Balajaran Sabah Datuk Maimunah Suhaibul minoboros do kinantakan dilo pinoposiliu do apat sikul nokoompit naraag id kinotutudan toun diti.
Minoboros isio do masaon do bogian dau papanau do pongumbasian id piipiro linominon sikul dilo.
“Montok SK Sentosa Tawau linominon laid nokoompit baino nokoundaliu noh doid linominon laid Kabota om au minomoguno do ponorinaan montok timpu diti.
“Montok lamin mongingia id SK Gusi Ulu Sugut Ranau linominon nokoompit masaon umbosian om mongingia ih nokoompit nakakandai kobolingkangan baino masaon miyon naamot id lamin tambalut mongingia suai.
“Masaon tokou nogi papanau do ponorinaan tosisikap id asrama kusai Sikul Pintangaan Kabansaan (SMK) Datuk Peter Mojuntin om susumikul nokoompit pinoiyon id linominon pongiyonan naamot,” ka dau.
Ontok 23 Februari, duwo blok linominon kayu SK Sentosa Tawau nopunso id kinotutudan kikira jam 12 tangadau om minomunso do piipiro linimput susumikul toun iso gisom tolu om linimput mongingia, upis, longkod kotos, mini dewan, linimput agama Silam om skim pagalasan buuk teks (SPBT).
Kiikira duwo minggu kalapas dilo kinotutudan minomunso iso blok asrama SMK Datuk Peter Majuntin do naamot nakaharo pinitimungan id jam 7.30 kosuabon om linominon lamin mongingia SK Gusi ih poinsumpak 97 kilometer mantad kakadaian Ranau nogipinoruput do nopunso id kinotutudan duwo tadau kalapas dilo.