Porinta poposodia ‘insentif’ TPIP
# Mongindapu pomorunan ponombuluian mositi popoingkawas ponokialitan -Masidi
KOTA KINABALU: Pokionuon di Montiri Ponombuluian, Koubasanan om Kinoiyonon Posorili Sabah Datuk Masidi Manjun tuh aparagat ngawi pomorunan ponombuluian id pogun diti maganu kosiwatan montok popoingkawas do ponokialitan om kosonongon kotorinaan ponokialitan ontok timpu tabantalan.
Minoboros isio do nokoposodia noh porinta do mogisusuai ponulungan om kounalan montok monulung aparagat popoburu do pomorunan ponombuluian popoingkawas kagu kangai-angaian tosonong kotorinaan sompori-pori.
“Pialatan dilo poposodia porinta do mogisusuai ‘insentif’ om pongunsuban kumaa popoburu pomorunan maya piipiro abaabayan miagal Tabung Kotundaan Kounalan Ponombuluian (TPIP) ih poposodia do kounalan kopongobian kousinan ponombuluian okitonan pagalasan.
“Poposodia nogi porinta do Tabung Poimbida Ponombuluian (TKP) ilo nopo nga kounalan pagalasan kumaa mongindapu kotopong tokoodo om osuhatanan. Mantad dilo pokionuon ku o toinsanan mongindapu pomorunan ponombuluian id Sabah mamagahau kosiwatan ih pinosodia montok popoburu do kotorinaan somporipori,” ka dau.
Noboros dau ahal dilo ontok minanahak boboroson ontok Timpu Kopohompitan Songowian Mongindapu Pomorunan Ponombuluian Pogun Sabah, hiti konihab.
Minoboros ih Masidi do otumbayaano bogian dau miampai haro nopo kosiwatan ngawi ih posodiaon do porinta, mongindapu ngawi pomorunan ponombuluian id pogun diti kosigampot doti do iman-imanon om pokimamaan di pinatatap.
Minongomi kokomoi abaabayan dilo, minoboros isio do ilo nopo nga iso timpu montok manahak kopointalangan kumaa mongindapu pomorunan ponombuluian id Sabah ih kaanu monulung pomorunan ponombuluian kinoiyonon.
“Abaabayan diti nogi nopo nga iso mantad impoon montok bogian komontirian mogiruruba/mitoguang miampai mongindapu pomorunan montok miapu hibokon pomorunan ponombuluian id Sabah.
“Suai ko ilo id suang timpu diti kaanu yahai manahak kopointalangan kikoompitan ‘insentif’ au kopohompit sukai pialatan dilo maya koporijistaran projik ponombuluian om Malaysia Tourism Quality Assurance (MyTQA),” kawagu dau.
Idsuang ahal dilo, alansan kopio ih Masidi do abaabayan dilo kaanu manahak kopointalangan om kapangaratian kumaa mongindapu ngawi pomorunan ponombuluian id Sabah kokomoi tonggungan somporipori sabaagi tambalut tosonong om osuhatanan kapanahakan kopoilaan kumaa bogian porinta montok mongorulan ahal ngawi ponombuluian id Sabah, om kanau nogi popoingkawas kagu pomorunan ponombuluian id Malaysia. Bernama