30,000 unit lamin posodiaon
# Kopinamot ‘Ekspo Jualan Perumahan-Ke Arah Sejuta Impian’
KOTA KINABALU: Kotinanan Pomulaminan Rayat 1Malaysia (PR1MA) poposodia do lobi 30,000 unit lamin kopinamot ‘Ekspo Jualan Perumahan-Ke Arah Sejuta Impian’ ih pohoroon id Longkod Dagang Sabah tumimpuun 15 gisom 19 Mac diti.
Boyoon Upisor Eksekutif PR1MA Datuk Abdul Mutalib Alias minoboros do soosomok 16,000 unit mantad 27 projik ih kopohompit do pointongkop pogun dilo posodiaon miampai gatang dagang okurang mantad RM300,000 seunit.
“Lobi tosonong, Sabah nakaanu poruntukan koduwo poinggagayo id Malaysia ih nookunan di Tinan Kotinanan (MOC) miampai anggaran gatang kotundaan omumuk (GDV) kigatang RM7.5 bilion.
“Mantad dilo, alapon tokou o toinsanan mogigion pointongkop Sabah doulu noh id Kota Kinabalu diti montok rumikot id ekspo om mamagahau kosiwatan diti montok kapaganu do lamin kaanu moninganu,” ka dau id Pitimbungakan Abar kokomoi ‘Ekspo Jualan Perumahan- Ke Arah Sejuta Impian’, hiti konihab.
Ka disio, au olimon do katanud miampai kinosunion togumu pogun diti, ilo nogi kaaanu popoingkawas rontob kopoposion rayat om kopomoruhang kogumuo rayat ih kipandapatan B40 om M40.
Ka dau, ilo kontodonon do kosusaan tinimungan pokimamaan kasanganu lamin sondiri sabap do gatang dagang lamin di akawas om kopoindalanan pagalasan bank di ogirot.
“Montok mongorulan ahal ngawi diti, porinta minonuridong PR1MA montok momonsoi lamin ngawi tosonong kopio id dagang miampai gatang purata 20 paratus lobi osuriba mantad kadar dagang.
“Lamin ngawi diti naganapan miampai kokikitanan pisuaian om kounalan ih kangaam montok koulalahon poimpasi Malaysia M40 ih doung kawawagu om olumaag kopio,” ka dau.
Namot dilo, PR1MA mongukab upis dagang koiso agensi dilo id Sabah ih kiharo id Aeropod ih poingoros nogi kakadaian tagayo diti.
Tumanud dau, upis ih ukabon doti ontok Ogos tabantalan dilo maganu laang sabaagi ‘hub’ montk mamalan, popotounda om popotilombus do projik ngawi PR1MA id pointongkop pogun.
Ontok ekspo dilo, miniwoyo ngawi PR1MA miampai mogisusuai agensi pomulaminan Pisompuruan om Pogun miagal Tinan Pomulaminan om Pamalanan Kakadaian Sabah (LPPB), Komponi Pomulaminan Pogun Berhad (SPNB), Projik Pomulaminan 1 Malaysia montok Upisor Tulun Ginumuan (PPA1M), om Dewan Bandaraya Kota Kinabalu (DBKK) minongukab pomiran miampai pinoposodia do kiikira 42,000 unit koiyonon.
Pisokodungan pialatan goduoduo agensi dilo pinaharo katanud miampai gaab koporintaan pogun montok mamajamin kolumaagan rayat miampai awakas, kaamung koposodiaan pomulaminan di kaanu moninganu.
Ilo nogi wookon mantad ‘janji’ Koporintaan Pisompuruan montok poposodia do 1 riong lamin kaanu moninganu id pointongkop pogun id suriba kamanaan Abaabayan Malaysia Ko11.
Suai ko ilo, kiginumu 12 kotundaan PR1MA id Sabah ilo nopo nga lobi 12,000 unit tiyonon pinokitonan nogi miagal projik PR1MA id Borneo Cove, Kota Marudu, Manggatal, Longkod Kakadaian Sandakan, om Ranggu.