Puru injin PRU mositi kitonggungan papanau karaja di pinatahak: Sapawi
Potitikid puru ih linantik suminiliu injin pomilian tagayo ginumuan (PRU) mositi kitonggungan om otootopot miampai nunu noopo karaja ih pinatahak.
Ponorikohon Barisan Nasional
(BN) Sipitang Datuk Sapawi Ahmad minoboros do tiwou tonggungan dilo kiguno kopio montok mongilag puru parti olunggui om kiharo id koyuon poinsodia montok tumoguang PRU ontok timpu rumikot.
“Tiwou tonggungan dilo noh ih kopongunsub dotokou montok kiginawo ototopot montok papanau do padaaman parti,” ka disio kopinamot ‘Simulasi Dry Run PRU14’ bogian Parlimen Sipitang id Dewan Serbaguna hiti di tadau Koonom.
Minoboros isio do tiwou tonggungan dilo nogi kopongunsub do puru parti montok toririmo poinsodia tumoguang PRU ih poboroson ontok soira-ira timpu noopo.
Ka disio tiwou tonggungan dilo popomilo do injin parti id toinsanan bogian papanaon miagal ih pokiuhangan om kiharo id koyuon di tosonong.
“Injin parti kapaamung do koinsasanai kaamung noh ‘counting agent’ ih apatut mongilo om minsomok pongundi,” ka disio.
Tumanud disio nopo nga nosiliu gaab montok papatantu do Sipitang iso mantad watas tagaras om osiliu ponoluod kumaa Barisan Nasional (BN) id pogun diti.
Nokotindapou nogi id ramai dilo kaamung noh Adun Sindumin Datuk Ahmad Bujang, Monunurat Umno Sipitang Alidin Mohamad, Boyoon Bogian LDP Sipitang Lau Kim Ling, Boyoon Koonduan Umno Sipitang Datuk Surinam Sadikun, Boyoon Komulakan Umno Sipitang Yamani Hafez Musa om Boyoon Puteri Umno Sipitang Suzie Hamat.