Gaga’on BN, ka Musa
# Rayat Sabah mositi popotilombus do kamanangan BN ontok PRU14
BELURAN: Rayat id pogun diti doulu noh mogigion ngawi id labus kakadaian mositi gumaga do koporintaan Barisan Nasional (BN) sabaagi parti pomorinta miampai manahak kamanangan tagayo ontok pomilian tagayo ginumuan (PRU) ontok timpu rumikot.
Boyoon Montiri Tan Sri Musa Aman minoboros do koporintaan BN posodia haro id suriba kopomuruanan Luguan Montiri Datuk Seri Najib Razak nopo nga porinta ih 'prihatin' om otopot kopio kaanu moningolig nasib rayat om popotounda pogun diti.
Ka disio, iso mantad tanda 'komitmen' koporintaan BN soira laang diolo ih kotilombus montok manahak do nunu noopo abaabayan toiko projik kotundaan kaamung noh id bogian labus kakadaian.
"Kotundaan mantad kawo 'infrastruktur' om kounalan kiguno obuli intongan tokou id watas labus kakadaian doulu noh ih ogumu noh kotundaan om kinosimbanan di okito kopio, om kanau nogi momogonop do kopokionuon rayat," ka disio.
Noboros disio ahal dilo ontok minanahak boboroson pinotimpuun do Pinoimaganan Injin Barisan Nasional Beluran id Dewan Datuk James Ratib, Kakadaian Wagu Botition, 101 kilometer mantad hiti di sosodopon tadau Kaapat.
Id ramai dilo, pinopotimpuun nogi ih Boyoon Montiri do Dewan Datuk James Ratib, Longkod Internet 1Malaysia (PI1M) om nogi Kotorinaan Perbankan Agrobank om Plaza DJR id Kakadaian Wagu Botition ih masaon tumounda.
Musa ih nogi Montiri Kousinan minoboros do laang tolidas bogian koporintaan BN solinaid diti nokopokito do 'komitmen' poimponu montok papatantu do koinsnai rayat mogisusuai tinaru om bansa kotilombus otingolig doulu noh idsuang ahal 'sosio ekonomi' koumoligan om susuai poh.
Sabaagi suntu ka disio, id bogian Parlimen Beluran diti kopohompit duwo bogian DUN ih linansanan BN ilo nopo nga Adun Sugut Datuk James Ratib, Adun Labuk Datuk Seri Panglima Michael Asang om Puru Parlimen Beluran Dato' Sri Dr Ronald Kiandee ih toririmo minggisom kumaraja om toririmo papanau karaja om kuasa ih pinatahak sabaagi momuruan id watas dilo.
"Beluran baino diti ogumu noh kinosimbanan miampai kounalan 'infrastruktur' miagal talun alun, sikulan om kogunoon kiguno kopio ih suai.
"Tantu kopio ounsikou oku om oropod, om rayat nopo nga asanang ginawo kaanu momoguolobi ogumu kotundaan doulu noh id watas diti," ka disio.
Minaganu isio suntu ih otopot kopio miagal kotundaan id Kakadaian Wagu Botition ih gulu poh au poh nokotounda, nga baino nokotounda nodi miampai mogisusuai ahal koburuon id suriba pomorintaan BN.
"Iti noh tanda 'komitmen' porinta id suriba kopomuruanan di Luguan Montiri ih toririmo opurokis om koilo kotundaan id Sabah doulu noh id watas labus kakadaian miagal id Beluran diti," ka disio.
Musa ih nogi ponorikohon Tinan Piturubungan Umno Sabah kotumboyo pogun diti kotilombus lobi kotounda, nga ih kiguno rayat mogisosokodung om papatantu do kamanangan tagayo BN ontok Pomilian Tagayo Ginumuan Ko-14 (PRU14).
Pinosorou nogi disio mooi rayat au asanang oimbayatan miampai ponombirangan bogian gugumaga ih toririmo kuminam mongimbayat diolo maya padamaan pulitik asampit ih mimbulai ontok oriot pomilian tagayo noopo.
"Sabah momoguno do iso porinta agaras om aandang miagal BN ih otopot kopio nakanu minanahak kapasanangan om koburuon kumaa toinsanan tinaru.
"Onu ih kiguno, tumilombus monokodung om otumbayaan kumaa porinta...InsyaAllah, pogun Sabah kotilombus koburu kalantoi om kotilombus kaanu kopongoligan mantad koporintaan BN.
"Monongkotoluod oku om ounsikou nakaanu minindahu gana montok rumuba miampai rayat hiti sundung pia atangkangau miampai tonggungan momuruan parti om porinta id bogian pogun," ka dau ih nogi Adun Sibuga om Boyoon Bogian Umno Libaran.
Namot dilo, id pitimbungakan abar kalaaps abaabayan pinonimpuunan injin BN Beluran, nasantaban ginawo Musa miampai rontob koposodiaan togirot mantad BN Beluran montok tumoguang PRU.
Otumbayaan isio miampai haro nopo sunduan om pisokodungan tawakas id pialatan
injin pikoruhangan BN, om tantu do aiso kobolingkangan kumaa parti montok gumaga do tirikohon ngawi posodia haro montok popomilo BN kotilombus momorinta.
Abaabayan dilo nogi pinaramai miampai pinokitonan sinding mantad di 'Raja Pop Malaysia', Dato' Jamal Abdillah ih pinorikot poimbida mantad Kuala Lumpur montok popoliis do ribuan mogigion Sugut songowian artis 'prolifik' kinoiyonon Sabah, Francis Landong.
Minanahak nogi boboroson id ramai dilo nga ih Adun Sugut ih nogi Boyoon Umno Bogian Beluran om Ponorikohon Popisamo BN Beluran Datuk James Ratib.
Nokotindapou nogi ih Puru Parlimen Beluran ih nogi Kumoduwo Speaker Dewan Rakyat Dato' Sri Dr Ronald Kiandee, Puru Parlimen Libaran Datuk Juslie Haji AJirol, Adun Labuk DSP Michael Asang, Boyoon Parti Bersatu Sabah (PBS) Sugut Datuk Jublee KK Zen om Boyoon Upko Beluran OKK Jair Munty.