Kapayan momoguno hansanon layat BN montok kapaganu kounahan hobi avasi, ka Francis
KEPAYAN: Koobian ih pointantu sabah aiso hansanon layat id Hamin Koundangan Pogun (DUN) Kepayan koposusa montok kapaganu do kousinan montok popoinggazo kounahan kiguno id boogizan dino.
Huguan Boogizan MCA Kepayan, Datuk Francis Goh minoboos do sabaagi pomitanan ogumu koizonon (taman) pamainan dazanak ngavi id Kepayan ih nongoumbak no om au miho gunoon miampai tavaavasi.
“Soginumu 10 taman dazanak id DUN Kepayan kaanu mongumbasi miampai sakadai poluntukan RM150,000 noopo mantad Konsol Uvang Penampang (MDPg). Sabap do poluntukan di pointantu, kalaja mongumbasi no ih kaanu pouhanon haid.
“Nga sokio ko kanang zou id Kepayan ontok Pomihian Tagazo Ginumuan ontok timpu mikot, mogium zou kousinan (poluntukan) ih kouha montok mamasang taap (momohuung)galanggang bola keranjang posodia kivaa, nogonopan sumbu mooi kaanu mamain o tinimungan komuhakan ngavi ontok timpu dongotuvong.
“Galanggang kitaap diti nogi kavasa dodizon tiizonon pinghudaan tuhun nongohoing om hongkod mangaju do pitimbungakan om kalamazan,” ka disido ontok minoi intong kalaja mongumbasi piipio taman pamainan dazanak id DUN Kepayan, konihab.
Piahatan taman dazanak ih tinombuhui disido nga Taman Oriental, Taman Victory, Taman Hiburan om Taman Delima.
Kinouvang isido di Poniikon Tinan Kobuu’on Suang Kakadazan (JKDB) Taman Nosoob David Chong om Upisol Kotundaan Mogiigizon (PPM) Kepayan Liau Su Sang.
Naamot dino, David ontok kosoomo koponokodung poimponu atag dino sabap tumanud disido montok timpu baino Taman Nosoob no kivaa galanggang bola keranjang kitaap.
Ka disido, galanggang bola keranjang id potitikid taman pomuhaminan mositi gonopan taap sabap kaanu nogi saavi-avi taman pomuhaminan niizanan tuhun ngavi Sina nogi nakaanu iso ‘balairaya’ miaga tinoodo id toinsanan kampung id boogizan DUN Kepayan.
Pokionuon nogi di David o saaviavi pongundi Sina id toinsanan taman pomuhaminan tu momihi di Francis sabaagi hansanon layat DUN Kepayan ontok pomihian tagazo timpu mikot montok mogovit hobi ogumu kotundaan doid saavi-avi taman pomuhaminan ih sohinaid diti somoonu kaanu pongintongan mantad hansanon layat (Adun) om Puu Parlimen Penampang mantad podi nahantoi do gugumaga.