‘Hak’ rayat Sabah gagaon
#MA63 Sabah nokosurat posuangon id manifesto BN - Ahmad Zahid
KOTA BELUD: Kumoduo Luguan Montiri Datuk Seri Dr Ahmad Zahid Hamidi manahak jaminan do ‘hak’ rayat Sabah ih nokosurat idsuang Pijonjian Malaysia 1963 (MA63) maan posuango id suang manifesto Barisan Nasional (BN) ontok Pomilian Tagayo Ginumuan Ko-14 (PRU14).
Mikuo minongulit do ‘komitmen’ Luguan Montiri Datuk Seri Najib Tun Razak kokomoi ahal MA63, ka disio kosokodung isio om mongibit tuh nonggononggo ‘hak’ idsuang pibatosan dino nokomoi ih nangaanu toiko notoliban mintong poguluion kumaa rayat Sabah.
“Koilo tokou, haro ih kuminam popointutun toiko papalaku ‘Sabah For Sabahan’, kaaka do MA63 nopo nga toisoiso ih mositi pindamaan di tinan pointantu. Nga, lumansan oku Luguan Montiri, lumansan oku BN manahak jaminan do MA63 maan posuango idsuang manifesto (BN) om ‘hak’ tulun Sabah tantu do ptilombuson gagaon.
“Kada soroho koporintaan BN au momoduli do MA63. Sabah kotumboyo tokou om otumbayaan miampai ‘komitmen’ luguan montiri do nonggononggo idsuang MA63 ih nangaanu noh toiko notoliban mintong, tantu om maan rundingo sabap pokionuon Sabah miagal nokosurat idsuang MA63 haro ‘hak’ montok patahakon.
“Nung ilo osiliu ahal, om osiliu ‘keprihatinan BN’, onu kagu ih muhang diolo (gugumaga) ungkito?,” ponguhotan di Ahmad Zahid.
Noboros di Ahmad Zahid ahal dilo ontok minanahak boboroson id Abaabayan Osuau Monokirumoh Songowian Mogigion Kota Belud id Kampung Kesapang hiti konihab.
Nokotindapou nogi ih Boyoon Montiri Sabah Tan Sri Musa Aman, Yang Dipertua Dewan Rakyat Tan Sri Pandikar Amin Mulia, Montiri id Luguan Montiri ih nogi Puru Parlimen Kota Belud Datuk Seri Abdul Rahman Dahlan, Montiri Komunikasi om Multimedia Datuk Seri Dr Salleh Said Keruak om Kumoduo Montiri Balajaran Takawas Datuk Mary Yap Kain Ching.
Minoboros Ahmad Zahid do monulung isio do Najib montok mongintong kapamanaan do ralan tonudon ngawi ih kikompitan miampai popoindalan kopogulian ‘hak’ rayat Sabah idsuang MA63 dilo.
“Iti nopo nga koporintaan BN...janji potopoton, boros poturukon. Idsuang ahal batos potopoton om batos poturukon diti, kuut rayat papatantu (mamagatang) nung au yahai manahak kangai-angaian di tosonong kopio,” ka dau.
Minoboros isio do nokosigampot noh BN do kangai-angaian kotorinaan tosonong kopio montok rayat om pogun mantad podi PRU13 tumanud do manifesto BN ontok pomilian tagayo dilo.
“Idsuang manifesto pomilian tagayo di nakatalib ih nakaamung minanahak jaminan tosonong kopio montok rayat Sabah, nakapanau noh dagai o 97.6 paratus ‘janji-janji’ dagai idsuang manifesto dilo,” ka dau.
Namot dilo, otumbayan ih Ahmad Zahid do Sabah kakaal kuasaon BN ontok PRU14 tumanud do kosompuruan om pisokodungan togirot parti ngawi pikoruhangan BN id pogun diti.
Minoboros isio do sundung pia panangodan kotilombus poontokon kumaa kopomuruanan BN Sabah doulu noh ih Musa, nga koporintaan BN tatap ogirot gisom baino asil sokodung togirot parti ngawi pikoruhangan BN id Sabah.
“Susuain id Sabah au insan aiso sangod manangod. Sangod id labus nangku toiko sangod mantad suang. Potitikid timpu mongopot, tantu haro pungit om mangkawot ih rumikot. Soira timpu mongomot toiko timpu kouwaan, tantu songintulud o mangkawot ngawi.
“Nga, mamantang oku tulun Sabah, sabap sundung pia mangkawot toiko pungit om tombolog pirit nogi toiko nunu noopo tombolog kuminam mangakan tuwa toiko mangakan parai, nga parai tatap ogirot om guas kouwaan tatap ogirot om au apanakau tulun,” ka dau.
Minoboros Ahmad Zahid do panangodan minsaasaru kumaa Musa, ih komoyon dau sabaagi ‘longkod graviti’, kitujuan paparatu do korikohonon ponorikohon tinan Piturubungan UMNO Sabah om Ponorikohon BN Sabah dilo ih nakaanu noh pinopotounda Sabah om pinopolumaag rayat pogun diti.
“Kada anggapo Tan Sri Musa sabaagi tulun. Tan Sri Musa nopo nga tinan kopomuruanan id Sabah ih kiguno om mositi gagaon tokou,” ka dau.
Narayou nogi disio o kopomuruanan BN Sabah kaamung noh Kabinet Pogun ih toririmo mingkakat ogirot id tohuri kopomuruanan Musa montok papatantu do koporintaan BN kotilombus ogirot. - Bernama