Projik Pamansaian Talun Alun Telipok-Kiulu-Randagong opongo doti ontok Mac 2019: Masidi
KOTA KINABALU: Projik Pamansaian Talun Laun Telipok-KiuluRandagong ih opongo doti ontok wulan (Mac) 2019 okitonan koponulung doti popoingkawas do kaganaan ponombuluian om pomutanaman id poompus lahan dilo. Montiri Ponombuluian, Koubasanan om Kinoiyonon Posorili Datuk Seri Panglima Masidi Manjun minoboros do soira ralan ih popiromut do watas Kiulu, Tamparuli om Ranau dilo opongo poimponu, ino kopongukab doti liwang kumaa tulun ngawi songkoiyonon mongukab do kaganaan tosonong ih haro id watas dilo. “Pinonguhanan projik diti popomilo doti do tulun ngawi songkoiyonon mongukab kakamot kigatang (permata) poinlisok’ ih olumis kopio om talun okurout di au poh nakasou. “Koiyonon talun id kampung ku ih kiharo id ralan dilo nogi kakaal haro mantad podi 50 toun nakatalib, miampai aiso kinosimbanan. “Iti kapanahak kosiwatan kumaa dotokou mongunsub do kaganaan ponombuluian montok mingkawas poompus ralan diti. Osorou ku haro doti ‘chalet’ om pongidopan kampung id koiyonon di olumis kopio om haro tongus di atamis ontok timpu dongotuong. “Iti nopo nga ‘game changer’ montok mogigion ih kiharo id poompus ralan diti mongukab ahal di tosonong kopio montok diolo,” ka dau ontok nuhot kokomoi Projik Pamansaian Talun Alun TelipokKiulu-Randagong ih nosiliu tapak kakapan di Luguan Montiri ontok tadau Kaapat. Noboros dau ahal dilo ontok romuto kopinamot Abaabayan Suminain Pihubayaan Pibatosan pialatan Kolej Sidma Sabah om Kolej Universiti Islam Antarabangsa Selangor (Kuis), hiti konihab. Projik pamansaian talun alun poompus 60 kilometer ih tinimpuunan minomonsoi ontok 2016 dilo nokoponolon balanja RM288 riong. Ilo opongo doti ontok Mac 2019. Gisom baino diti, 65 paratus noh nopongo projik dilo, ilo nokopogulu timpu kiginumu 20 paratus. Masidi, ih nogi Puru Lamin Koundangan Pogun (Adun) Karanaan minoboros do pamansaian talun alun poompus talun alun dilo popomilo doti do mogigion songkoiyonon popoingkawas do dagang asil pomutanaman diolo sumusuhut sinodu pindalanan di maid-laid minsomok. “Ontok timpu gulu poh maganu timpu montok papaatod kinotuan kiroun alaalaid gisom kontodonon do angaraag kinotuan dilo soira korikot id kapangadagangan. “Nga miampai pinamansaian ralan diti, osorou ku obuli o mororobuat korikot doid Kota Kinabalu mantad piwolitan Ranau om Kiulu id suang timpu okurang sojam. “Iti tantu noh kapanahak kosiwatan kumaa diolo kapaganu do konuonuan di lobi tosonong soira papadagang do kinotuan id ogumu koiyonon,” ka dau.