OtumboyoBN kamanang toinsanan tirikohon id Parlimen Beaufort

BEAUFORT: Otumboyo kopio o Barisan Nasional (BN) kaanu popotilombus do tirikohon Parlimen Beaufort om Lamin Koundangan Pogun (DUN) Kuala Penyu ontok Pomilian Tagayo Ginumuan Ko-14 (PRU14) diti, ka di Ponorikohon BN Beaufort Datuk Isnin Aliasnih.

Isnin ih nogi Boyoon UMNO Bogian Beaufort minoboros do tumanud do kinodimpotan tosonong kopio BN id Parlimen dilo, kotumboyo nogi o bogian dau do kaanu mamagahau tirikohon DUN Klias ih namanang di gugumaga ontok pomilian tagayo nakatalib.

“Nokosodia tokou noh montok tumoguang miampai PRU14... nakapanau tokou noh om kumaraja id koinsanai Longkod Watas Mongundi om raan id pointongkop tirikohon Parlimen diti.

“Noilaan tokou nogi kinolomion pogului diti montok mamagahau DUN Klias,” ka disio kuminaa monunurat abar kalapas uminampai Abaabayan ‘Maju Bersama Negaraku’ montok monginsonong Gereja Katolik St Zeno Kampung Batu 58 hiti, konihab.

Ontok pinomilian tagayo nakatalib, Isnin ih nogi calon BN DUN Klias naala di calon Parti Keadilan Rakyat (PKR) Datuk Seri Lajim Ukin miampai majoriti okuudi 179 undi. Isnin nakaanu 6,145 undi manakala Lajim nakaanu 6,324 undi.

Poingkuro poh nga, tinongkiadan di Lajim o PKR ontok Oktober toun nakatalib om minonuridong Parti Harapan Rakyat Sabah miampai minongigit karaja porosiden parti dilo.

Uhoto kokomoi calon montok tirikohon dilo, minoboros Isnin do monokodung isio isai noopo ih pilion BN montok tumanding.

“...isai noopo obuli silihon calon om ih Ponorikohon BN Datuk Seri Najib Tun Razak om Ponorikohon BN Sabah Tan Sri Musa Aman ih koilo montok momili sabap iyolo lobi koilo isai ih otorimo om obuli kumaraja montok rayat.

“Au tokou mabanta nunu noopo koputusan ih wonsoyon (pomilian calon). Manahak tokou sokodung miampai au opibahagi montok momodimpot kamanangan,” kawagu disio. -Bernama