‘Indeks’ koimaan taraat id Sabah nokoinsuriba
# Minanalasai 6.3 paratus montok potitikid 10 kes
KOTA KINABALU: ‘Indeks’ koimaan taraat Sabah toun diti nokoinsuriba kiginumu 12.19 paratus miampai kinodimpotan minanalasai do kes kilinangkou 63 paratus miampai koinsasanai.
Kumoduwo Pesurujaya Polis Sabah Datuk Razarudin Husain minoboros do montok potitikid 10 kes di antakan, nakanau tinimungan Pulis Kontinjen Sabah minanalasai do kiginumu 6.3 paratus.
“Suai ko ilo, ponoluodan rontob koimaan taraat Sabah kuminaa ginumu koinsasanai id pogun diti nga 5.98 paratus noopo ih pinapataru do pogun diti id tukad ko-6,” ka dau id pitimbungakan abar kalapas
pinotimpuun do Abaabayan Pinonguludan Kopoingatan Tadau Pulis ko-211 2018, hiti konihab.
Pinatarang nogi disio o tinimungan pulis Bukit Aman doulu noh unit Counter Terrorism tumilombus papaharo do pamagakaman kumaa nonggo-nonggo tulun ih kohompit id suang kaparagatan tangaraat.
Ka disio, ilo sumusuhut kinagakaman turu tulun taraat ontok 15 Mac nakatalib hinonggo songulun mantad diolo nagakom hiti.
“Kinagakaman diti tolimbuson sowolionon do Bukit Aman montok laang om ponoriukan potilombus,” ka dau.
Naamot dilo, minoboros ih Razarudin do nokosodia noh Tinimungan Pulis Diraja Malaysia (PDRM) montok mongintong koumoligan ontok Pomilian tagayo Ginumuan Ko-14 (PRU14).
Ka dau, toinsanan watas tamangan osorisid miampai aiso nunuunu okurangan puru koumoligan montok papatantu do koinsasanai koposodiaan montok PRU14 kapanau tososonong.