Ruputan media songkosuaian kokomoi Malaysia ‘awagat sampaping’ om ‘au aandang’ pinusing kawagu- Salleh

KUALA LUMPUR: Montiri Komunikasi om Multimedia Datuk Seri Dr Salleh Said Keruak konihab monondos do ruputan media songkosuaian kokomoi Malaysia sabaagi ‘awagat kopio sampaping’ om ‘au aandang’.

Minoboros isio do minanahak iyolo kokitonan do nunu noopo ahal porinta nopo nga au osonong om parti gugumaga nopo nga irad ko ‘malaikat’.

Ka disio ruputan kokomoi Malaysia om Luguan Montiri Datuk Seri Najib Tun Razak pinusing kawagu mantad toun-toun nakatalib kokomoi susuap, pomilian tagayo ih au otulid, okurangan ‘demokrasi’, pongoliman kosimbayanan mimboros om susuai poh.

“Mantad podi duwo tadau nakatalib, media songkosuaian minanangod Malaysia miampai koinsasanai om doulu noh Luguan Montiri Datuk Seri Najib Tun Razak.

“Iti aiso kohimayaan sabap do Tun Dr Mahathir nokoumbal minoboros do ‘sansagan dagai momoguno do kopoluyungan media songkosuaian, BN (Barisan Nasional) nogi obuli momonsoi irad dilo, iyolo haro ogumu tusin montok mambarai mononoriuk mantad Cambridge’,” ka dau maya ponuratan blog disio.

Salleh ih nogi Bendahari UMNO minoboros do mantad podi 30 toun nakatalib, poingkuro poh nga ontok Dr Mahathir nosiliu luguan montiri gisom baino, media songkosuaian kakaal moboros do ahal iso’i.

Minoboros isio do gugumaga kalapas dilo pinaparayat do ruputan diti montok manahak pokitonan do pointongkop pomogunan sumaap Malaysia.

“Onu ih au naanu do media songkosuaian minamarait id suang ruputan diti nopo nga ogumu kes susuap ih masaon soriukon di Tinan Monorina Pomunsaan Susuap Malaysia (SPRM) nopo nga id pogun Pakatan Harapan momorinta ilo nopo nga id Selangor om Pulau Pinang.

“...toiko kokomoi panandasan ponipuan ontok pinomilian tagayo ginumuan ko13 (ontok 2013), kaaka do (tinandasan minogowit suminuang) 40,000 pongundi Bangladesh, ih otopot kopio do pilasu,” ka dau. -Bernama