Kada pagadaio timpu tabantalan pogun, kopoingatan Sapawi kumaa puru ‘veteran’ ATM
SIPITANG: Pinosorou o puru nokotuo Tinimungan Susumangod Malaysia (ATM) mooi maganu pomitanan mantad susuian padamaan ontok id kotorinaan gulu poh om au tutumanud laang gugumaga ih tuminga id waig olobou ontok Pomilian tagayo Ginumuan Ko-14 (PRU14).
Ontok minanahak pkopoingatan dilo, Puru Parlimen Sipitang Datuk Sapawi Ahmad minoboros do padamaan ‘veteran’ susumangod ontok timpu gulu poh noponu ponokialitan montok papataru pogun id korikohonon aadang, koburu om otoonong baino.
Ka disio, kotoonongan om kolumaagan ih nosigampot baino mositi potilombuson montok kopongoputan koburuon om kolumaagan sinakagon timpu rumikot.
Minoboros isio do puru nokotuo (veteran) susumangod tuminoguang ahal padamaan koponokialit kopio, om mantad dilo timpu tabantalan au obuli pagadaion.
“Haro tinan ih kitiwou agayo muhang monimban porinta ih haro baino, nga padamaan diolo okon montok kogunoon pogun, katapi montok kogunoon tinan sondiri om muhang monuli ginawo di au nasantaban,” ka disio.
Tumanud disio, laang mongolon porinta ih haro okon ko asanang miagal mongolon garung sabap haro doti kobolingkangan om waya dilo di agayo kopio, miagal nogi ih otopot kopio id piipiro ‘tamadun’ kuasa labus.
Noboros disio ahal dilo ontok minanahak boborosn id abaabayan mogirurumoh songowian Koisaan Veteran ATM (PVATM) Parlimen Sipitang hiti konihab. Abaabayan dilo notindapou lobi 300 puru PVATM om paganakan sompori-pori.
Nokotindapou nogi ih Panakadai Montiri Ponombuluian, Koubasanan om Kinoiyonon Posorili ih ponogi Adun Lumadan Datuk Kamarlin Ombi, Adun Sindumin Datuk Ahmad Bujang om Ponorikohon PVATM raan Sipitang Kahmis Bair.
Sapawi ih nogi potunud Yayasan Sabah minoboros do porinta toririmo manahak pongintongan kotundunan puru ‘veteran’ susumangod, kaaamung mantad kawo ekonomi, sosial, balajaran om kolidasan.
Ka disio, ilo mositi wonsoyon sabap kosokodung o porinta om mamagatang pinonoluod puru ‘veteran’ susumangod mantad gulu poh.
“Kotumboyo o porinta do tonggungan ‘veteran’ susumangod sabaagi tulang toruntud ih gumaga do pogun. Kinalantaian ih nosigampot baino asil padamaan ‘veteran’ susumangod, gisom nokopogowit kaandangan sundung pia kopoompit do mogisusuai tinaru,” ka disio.
Isio ih nogi boyoon bogian Umno Sipitang pinoposorou diolo mooi toririmo miingat-ingat miampai ponginaman bogian gugumaga papatangkid do kopoilaan om mangamu-amu karaja porinta montok kapaganu kosianan ontok PRU14.
Ka disio, kuminam gugumaga tumingan id waig olobou montok kogunoon tinan diolo noopo om padamaan okon montok kogunoon rayat.