Zozopon doti Parlimen minggu tabantalan: Dahlan
SEPANGGAR: Zozopon doti o Dewan Rakyat pogului poimogonon di Luguan Montiri Datuk Seri Najib Tun Razak o ‘manifesto’ Barisan Nasional (BN) ontok koowion minggu tabantalan, ka di Potunud Komunikasi Strategik BN Datuk Seri Abdul Rahman Dahlan konihab.
“Doti do, tumanud toilalaan dagai (BN) pogului diti, kopoimaganan manifesto BN wonsoyon kalapas Parlimen ozozob. Ilo nosiliu noh toiso-iso koubasanan.
“(Poingkuro poh nga) au oku koilo do ubasanan nangku di Datuk Seri Najib o laang ih iso’i (popoimagon do manifesto kalapas Parlimen ozozob),” ka dau kumaa monunurat abar kalapas minoi intong koyuon talun alun om kapamansaian parit id Sepanggar hiti.
Abdul Rahman, ih nogi Montiri id Koupisan Luguan Montiri, minoboros do manifesto dilo pinatantu poimogonon minggu tabantalan, om tadau koimpupuson pitimbungakan Dewan Rakyat nga ontok 5 April.
“Haro sosongulun minomisunud dogo, nga au oku kaanu papatantu ahal dilo. Ikoyu (rayat) obuli mamajangka do Parlimen maan zozopo minggu tabantalan,” ka disio.
Tumanud Abdul Rahman, manifesto BN maan poimogono miampai saragagayaan id iso abaabayan id Bukit Jalil, Kuala Lumpur.
Montiri dilo minoboros, nokokito nh isio do manifesto dino nokomoi, ih kisuang ahal ‘tosonong om kopotigog’, doulu noh montok Sabah.
“Haro nogi piipiro ahal (idsuang manifesto dilo) ih au toou insan kosorou pogului diti, poingkuro poh nga yahai (momuruan BN Sabah) nokopindaama noh kopio kokomoi ahal dilo mooi luguan montiri pinoposuang do iso toiko duwo mantad ahal dilo do id suang manifesto dilo. Andadon nopo gisom kopoimaganan dilo (montok mongilo ahal dilo),” ka disio.
Minoboros Abdul Rahman do ‘hak’ Sabah idsuang Pijanjian Malaysia 1963 (MA63) nogi maan posuango do id suang manifesto dilo.
Sabaagipuru Komiti Papanau Kabansaan kokomoi Kopoinsiribaan Kuasa Kumaa Sabah om Sarawak, ih ponorikohonon songowian Montiri Labus Datuk Seri Anifah Aman om Montiri id Koupisan Luguan Montiri Datuk Seri Nancy Shukri, minoboros isio do timpu montok mongintong kawagu MA63 nakatalib noh om baino nopo nga timpu montok papanau dilo nodi.
“Katama oku manahak jaminan kumaa dikoyu do Datuk Seri Anifah om Datuk Seri Nancy songowian ngawi puru Kabinet suai mantad Sabah om Sarawak otootopot ‘komited’ tuh sunduan M63 potundolion, katanud miampai kouhangan luguan montiri mooi nunu noopo ih naanu noh miamapi au tinomod toiko tinomod mantad Sabah (om Sarawak), maan poguluio,” ka dau.
Minoboros Abdul Rahman do manifesto dilo okon ko toiso-iso ‘dokumen’ ih papatarang kokomoi toinsanan ahal, nga tumanud disio, ilo kisuang ahal ih au poh insan pinogibabarasan pogului diti, toiso-iso ih mamajanji o BN montok wonsoyon idsuang timpu limo toun timpu rumikot sokiro ko onuan iyolo kuasa montok tumilombus momorinta pogun diti.
“Mantad dilo, kipomusarahan oku do Tinan Monorina Ponoriukan Diraja (RCI) kokomoi modidikot aiso kasagaan id Sabah au apatut do posuangon doid suang manifesto dino nokomoi sabap ahal dilo nakapanau noh om noilaan noh rayat,” ka dau.
Minoboros isio do manifesto dilo apatut basaan songowian ‘komitmen’ suai ih noboros oh koporintaan BN kumaa rayat om pogun kaanu mamarati miampai lobi atarang.
“Sabaagi suntu, mositi basaan dikoyu manifesto dilo soroinsan-insai miampai nunu ih nakajanji noh dagai (koporintaan BN) idsuang Abaaabayan Malaysia Ko-11, dokumen Transformasi Nasional 2050 om balanjawan ih pinoboros di luguan montiri tikid toun”. -Bernama