Kiguno kopio manangod dadah
# Panagih nokoingkawas 18 paratus - MCPE
KOTA KINABALU: Kogumuo panagih dadah id pointongkop pogun nokoingkawas kiginumu 18 paratus ontok 2017 piagalon toun pogului dilo, kinootuson dilo nokopongunsub do Yayasan Pomunsoan Koimaan Taraat Malaysia (MCPF) mokianu tulun ngawi tuh popoingkawas do karaja manangod dadah.
Puru Tinan Eksekutif MCPF Tan
Sri Lee Lam Thye minoboros do dadah kakaal nosiliu sangod numbur iso pogun om mokianu tulun togumu montok papanau do tonggungan aparagat sabaagi laang montok poposiliu do Malaysia koidu dadah.
“Toun nakatalib kogumuo panagih dadah nokoponurat kiginumu 25,992 om mantad kogumuo dilo kiginumu 18,440 nopo nga panagih kawawagu. Mantad ginumu dilo, panagih kusai kiginumu 24,926 om 996 nopo nga tondu,” ka dau kumaa monunurat abar kalapas tuminindapou abaabayan Paganakan Mimbosikol Tadau Minggu hiti, konihab.
Miampai kiikira 80 paratus panagih dadah kiumur pialatan 13 gisom 40 toun, minoboros ih Lee do kiharo kogunoon kopokianu kopio montok tulun ngawi mogisosokodung ngawi manangod kobolingkangan dadah.
Pokionuon nogi disio o puru paganakan, doulu noh molohing, montok umampai osondikot idsuang kopoposion tanak ngawi diolo om mongintong kaparagatan diolo montok papatantu diolo au osiliu munggui kumaa kasalaan momoguno dadah.
“Kimpin kopurimanan nosiliu noh kiguno kopio montok monulung popoingkawas do rontob kopurimanan tulun ngawi kokomoi koligogon dadah.
“Suai ko ilo abaabayan miagal Paganakan Mimbosikol Tadau Minggu id Sabah diti kaanu mongimbayat do koulalahon poimpasi lobi olidas montok monorina do kosotolon om okon ko miampai maganu dadah,” ka dau.
Minoboros ih Lee do ontok toun nakatalib Pulau Pinang, Kelantan om Kedah nokoponurat do kogumuo panagih dadah poingkakawas, sompori-pori kiginumu 3,884; 3,700; om 2,655 om Putrajaya nokoponurat ginumu poinsusuriba miampai 38 panagih.
Tumanud dau, kawo dadah ih poinggugumu nasalaan minomoguno poompus 2017 nga ‘methamphetamine’ toiko lobi ointutunan sabaagi syabu.
Namot dilo, Montiri Kotundaan Mogigion om Ahal Momoguno Sabah Datuk Jainab Ahmad Ayid minoboros do sundung pia koporintaan pogun om bogian monguasa ‘relevan’ minggisom kumaraja mongipop kasalaan momoguno dadah id Sabah, kiharo katangaban kokomoi ‘trend’ wagu kasalaan momoguno dadah ih bulun noh
TOMBULUI tapantang minokigambar kaandaman pogului tuminimpuun abaabayan mimbosikol dilo.
kaanu momunso di tulun ngawi pogului ahal dilo osiliu lobi araat.
Tandasan disio mantad podi kotimpuunon toun nakatalib, kiharo doti bogian monguasa au kaanu mongilo korikotan dadah dilo idsuang tinan panagih asil mantad kopomogunaan mogisusuai kawo dadah ‘sintetik’.
“Om, pokionuon ku o toinsanan molohing montok momorisa barang sanganu tanak ngawi om kantung sikul diolo. Kada onuai alasan atangkangau kopio miampai karaja gisom au koilo ih wonsoyon do tanak dikoyu.
“Au tokou mimang haro o panagih tomulok ih moboros do nokoompit iyolo miampai kobolingkangan dadah sabap molohing diolo au maganu awagat o tinan diolo,” ka dau.
Abaabayan Paganakan Mimbosikol Tadau Minggu pinoimagon di Boyoon Montiri Sabah Tan Sri Musa Aman, miampai pinopoidu do 451 tulun ih minaganu bogian id abaabayan mimbosikol kisinodu 66 km mantad Teluk Likas hiti gisom doid Salut, doros Sepanggar.
Mogisusuai abaabayan nogi pinaharo kopinamot abaabayan dilo kaamung noh pomorisaan kolidasan aiso kabarai om pokitonan kopurimanan koligogon adadah. -Bernama