Musa poposunud zozopon DUN Sabah pogirotonkuasa baino
KOTA KINABALU: Posunudon di Boyoon Montiri Tan Sri Musa Haji Aman o kopongozozopan Lamin Koundangan Pogun (DUN) Sabah pogirotonkuasa ontok 7 April 2018 (baino) montok manahakralan Pomilian Tagayo Pogun ko-14 (PRU14) pohoroon.
Noboros disio ahal dilo kalapas nakaanu kasagaan mantad Gounal Pogun Sabah Tun Juhar Mahiruddin, hiti konihab.
“Zozopon o DUN Sabah pogirotonkuasa ontok 7 April 2018 (tadau Koonom) montok popomilo do PRU hiti pohoroon.
“Kalapas koporintaan Barisan Nasional (BN) minanahak kotorinaan om pinopolubuk tinan doid padamaan moningolig nasib rayat om popoburu do pogun Sabah ih koupusan, baino norikot nodi timpu montok momuruan manahak kawagu kuasa kumaa rayat,” ka dau ontok id pitimbungakan abar koposuudan pongozozopan dino nokomoi ih winonsoi id kinoiyonon poimbida dau id Sri Gaya, konihab.
Alansan kopio isio tuh kotilombus rayat manahak sokodung om kotumbayanan kumaa BN maya kuasa di tagayo idsuang PRU timpu diti montok mamajamin kopongoputan kotundaan om papalantoi do hibokon pogun montok kolumaagan timpu tabantalan di lobi tosonong.
Ka dau, isio songowian ngawi Jemaah Montiri pogun diti monongkotoluod do pamagatangan om mongunsikou kumaa toinsanan bogian ih uminampai ngawi miampai porinta pinapalantoi do agenda kotundaan montok kolumaagan rayat.
“Maya toinsanan karaja ih wonsoyon tokou solinaid diti montok popoturuk do kuasa om tonggungan di nakatahak noh mantad rayat idsuang PRU nakatalib... sumuang tokou kakampungan monulung rayat id pointongkop pogun.
“Papanau tokou do mogisusuai kotimpuunon om ahal kotundaan montok kogunoon rayat, tantu noh do osiliu kalansanan tokou tuh rayat momonsoi pilion di opurokis om osonong kopio tumanud do kinodimpotan, kinalantaian om ‘track record’ ih ponokotanda do kotopotan pulitik takawas mantad koporintaan BN solinaid diti,” ka dau.
Namot dilo, pinatarang nogi di Musa do saman ih winonsoi do Parti Cinta Sabah kikompitan miampai piwolitanan kawagu id Sabah. Minoboros ih Musa do saman dino nokomoi au kapagantob papaharo do pongozozopan DUN.
Ka dau, kes dilo nogi au kpangasou do 60 tirikohon DUN ih posodia haro om Parlimen nogi au pinapasaga do kopomoruhangan tirikohon om Gounal Pogun ( Yang Dipertuan Agong) nogi nga au pinapalabus ponuhuan montok pomoruhangan dilo.