Parlimen zozopon baino, posunudon di Najib
PUTRAJAYA: Parlimen zozopon suab (baino) montok manahak ralan kumaa Pomilian Tagayo Ginumuan ko-14 pohoroon, ontok kowion wulan diti toiko kotimpuunon wulan Mei.
Posunudon di Luguan Montiri Datuk Seri Najib Tun Razak do pongozozopan dilo id Linominon Perdana Putra koniab, misuai miampai koubasanan koposunudan om pongozozopan winonsoi ontok tadau ih iso’i.
“Muhang oku poposunud kumaa koinsanai rayat Malaysia do nokotoguang oku noh id suriba Duli Yang Maha Mulia Seri Paduka Baginda Yang di-Pertuan Agong ke-15, Sultan Muhammad V om pinapatahak do surat kuminaa disio mokianu kasagaan mooi do Parlimen ko13 zozopon ontok tadau Koonom, 7 April 2018,” ka dau id pason poimbida pongozozopan Parlimen ko-13.
Koposunudan pongozozopan Parlimen dilo posiaron miampa kotilombus maya televisyen om Facebook poimbida Najib mantad Upis Luguan Montiri id jam 12 tangadau om tindopoon di Kumoduo Luguan Montiri Datuk Seri Dr Ahmad Zahid Hamidi om montiri ngawi Kabinet.
Kiginumu 14.9 riong pomili nokorijisto obuli mongundi tumanud doid Nokorijisto Pomili Suku Kaapat 2017 ontok tadau ih potonton do Tinan Monorina Pomilian Tagayo (SPR) tiinu.
Mongintong ngawi pulitik mamaramal do pomilian tagayo dilo maan pohoroo kowion wulan toiko kotimpuunon wulan tabantalan, pogului tulun ngawi Silam popoturuk do sambayang puasa ontok pintangaan Mei.
Miampai pongozozopan Parlimen ko-13, pinosorou di luguan montiri o toinsanan boyoon koporintaan pogun montok kapaganu do kasagaan Sultan om Yang Dipertua Negeri (Gounal Pogun) sompori-pori, suai mantad Sarawak montok popomilo do pomilian tagayo pohoroon do insan-insan.
Minoboros ih Najib do pongozozopan diti ponokotanda do ‘komitmen’ koporintaan BN nokomoi kopoindalanan ‘demokrasi’ kiparlimen miampai popomilo do PRU14 papanaon tumanud koturan undang-undang.
Pinapatarang do kuasa montok momili porinta kiharo poimponu id longon rayat, minoboros isio do toinsanan tinan doulu noh parti ngawi tumanding mositi karati do Malaysia tumanud do sisitom pomilian tagayo ih tumanud do ginumu tirikohon namanang om okon ko tumanud do pongiraan undi ‘popular’.
Songowian ngawi Ahmad Zahid om nuludan kompomuruasnan BN, Najib ih ponogi Ponorikohon BN om Porosiden UMNO minoboros do iyolo rumuba rayat id toinsanan pogun montok manahak kopoilaan om popotumboyo do rayat Malaysia kokomoi ‘manifesto’ oo hibokon pogun di napalan.Bernama