Sokodungon isai noopo calon BN id Kota Marudu: Wetrom

KOTA KINABALU: Boyoon Umno Bogian Kota Marudu Datuk Wetrom Bahanda minoboros do monokiala isio miampai koputusan Boyoon Montiri Tan Sri Musa Aman om UMNO bogian dilo manahak sokodung poimponu kumaa isai-isai noopo calon Barisan Nasional (BN) ih tumanding id tirikohon Parlimen om Lamin Koundangan Pogun (DUN) Kota Marudu ontok pomilian tagayo ko-14 (PRU14).

Minoboros Wetrom do suhuon disio o toinsanan puru om injin pomilian tagayo UMNO Kota Marudu montok papatantu BN mamalantoin toinsanan tirikohon id watas dilo ontok PRU14.

“Poingkuro koyuon noopo, monokodung yahai kumaa isai noopo calon BN id Kota Marudu. Ilo otopot. Baino nga nokoboros ku noh miampai Boyoon Montiri (Musa), nunu koyuon noopo, potontuon do UMNO Kota Marudu o toinsanan calon tokou kamanang,” ka disio.

Noboros di Wetrom ahal dilo kumaa Bernama ontok romuto kalapas minoi isio suminolowot isio Musa ih nogi Boyoon Piturubungan UMNO Sabah id Sri Gaya hiti ontok tadau Kolimo nakatalib.

Ahal tirikohon DUN Matunggong ih ponogi kuota Parti Bersatu Sabah (PBS) nokoimbulai soira Kumoduo Luguan Montiri Datuk Seri Dr Ahmad Zahid Hamidi ontok kinakapan disio doid Kota Marudu di kawawagu minangatag mooi DUN Matunggong ‘pinoolos’ kumaa UMNO montok ‘majoriti kamanangan BN id watas diti nokoingkawas.

“Mantad podi kinakapan Kumoduo Luguan Montiri di kawawagu, au oku poh nokoumbal minomonsoi kopoilaan sundung pia songodon yahai. Nga muhang oku popointarang hiti do UMNO Kota Marudu au insan tinobok mantad tohuri. Nunu noopo koyuon, sokodungon dagai isai-isai noopo calon Barisan Nasional id Kota Marudu,” ka disio.

Onu ih nantakan di kawawagu otopot kopio ih Wetrom nopo nga atag momuruan longkod montok popoingkawas ginumu ‘majoriti’ toiko kamanang tagayo montok DUN Matunggong om Parlimen Kota Marudu.

“Ilo formula ih pinaatag. Ilo atag noopo. Nung au torimoon nga au monguro. Ilo koubasanan idsuang pulitik. Pisosoromo montok bogian PBS irad ko nookunan noh.

“Nga kalapas pinutus do iti kakaal montok PBS, aiso ralan dagai suai, mositi tumanud yahai ‘status kuo’, yoho sabaagi Boyoon UMNO Bogian monuhu do injin dagai montok kumaraja montok papatantu do toinsanan (calon BN) kamanang,” ka disio.

Mantad dilo Wetrom, minoboros do baino aiso koimbulai ahal UMNO maan ‘sabotaj’ toiko au monokodung calon BN Kota Marudu ontok PRU14 om mokianu toinsanan puru UMNO Kota Marudu tuh minggisom kumaraja monokodung calon BN.

Noboros nogi di Wetrom do parti gugumaga nopo nga sangod BN om au kopio mokirurunding toiko mogiupapakat miampai diolo. -Bernama