Francis manaak pongintongan poimponu balajalan id Kapayan
PENAMPANG: Huguan Boogizan MCA Penampang Datuk Francis Goh ogumu no minanaak sakadai balajalan doid susumikul om sikulan id Kapayan.
Upisol Balajalan Uvang (PPD) Penampang Mojuntin Ebin minoboos do susumikul om sikulan id Kapayan nakaanu sakadai dino maza Biink Balajalan Datuk Francis Goh (TPDFG) ih tinuidong tohu tohun nakatahib.
Ka disido, piahatan sakadai dino nga koponuhungan kousinan susumikul kinangazan om nogi koponuhungan kousinan montok Koisaan Mongingia om Mohoing (PIBG) sikul.
“Montok dogo, isido nopo nga songuhun momuu’an ih kiginavo om kikoinsamadan kozo id suang ahal balajalan. Mimang isido mintong tanak ngavi id Kapayan kapaganu kahantazan tavasi okon noopo id boogizan sikul nga id boogizan universiti nogi.
“Kikoinsamadan disido montok maganu pongintongan tavagat ahal balajalan id uvang diti pinapadadi disido sabaagi ‘idola’ susumikul id Kapayan,” ka disido.
Naamot dino, songuhun nokopinsin polinta, Martin Lugu minoboos do zi Francis nopo nga songuhun ih kipomusaavan osodu om kopomuu’anan disido kangaam miampai koozuvon iso timpu.
“Kobulihan om toihahaan disido id nuununu noopo kaganaan mositi omitanan om potungkuson doid tinimungan tomuhok ih kakaal mogium ngavi ingkuo haang tavasi idsuang kotundaan pomusaavan,” ka disido.
Ka disido, sabaagi momuu’an korporat ih nakahantoi, obuli zi Francis papadahin do kabaahan om toihahan disido doid tinimungan mongindapu tomuhok tu kivaa kogiiginovoo koponokiahit id suang kaganaan kotudaan poinggagazo.
“Obuli isido adadi ‘idola’ doid tinimungan tomuhok montok dumadi mongindapu ih kivaa koponokiahitan kangaam miampai ningkokoton iso timpu.
Mantad dino, kosudong kozo pihion isido hansanon layat Kapayan kahapas pomihian tagazo ko-14 (PRU14),” ka disido.