Kuut au minonorimo saman mokianu Najib popointarang piwolitanan kawagu id Sabah

KOTA KINABALU: Kuut Takawas hiti, konihab au minonorimo saman minonimpuun ih mokianu ponuhuan kuut montok mononsog Luguan Montiri Datuk Seri Najib Tun Razak popointarang do ruputan ponoriukan kawagu piwolitanan bogian pomilian tagayo kaamung 13 tirikohon Lamin Koundangan Pogun (DUN) ih wagu id Sabah.

Hakim Azhahari Kamal Ramli minomonsoi koputusan dilo ontok ‘prosiding’ id suang linimput.

Luyar Yong Yit Jee ih luminansan tinimungan linuguanan Porosiden Parti Progresif Sabah (SAPP) Datuk Yong Teck Lee sabaagi ‘plaintif’, minoboros do au tinorimo kuut o saman dilo sabap ilo aiso ‘locus standi’ toiko korikohonon id suang undang-undang om kotinanan.

“Kagu nga koputusan dilo winonsoi nopo nga okitonan ‘akademik’ sabap baino diti nozozop noh Parlimen om aiso nunuunu pitimbungakan kaanu papanaon.

“Poingkuro poh nga, bogian ‘plantif’ kakaal kikosiwatan papaatod ‘petisyen’ doid Kuut Pomilian Tagayo kalapas asalasai pomilian tagayo ko-14,” ka dau kuminaa monunurat abar kalapas ‘prosiding’ dilo.

Ontok 2 April nakatalib, tinimungan pironitan momuruan gugumaga Sabah dilo pinafail saman mokianu ponuhuan kuut montok mononsog luguan montiri popointarang do ruputan ponoriukan kawagu piwolitanan bogian pomilian tagayo id Sabah mantad Suruhanjaya Pomilian Tagayo (SPR) id Dewan Rakyat.

Id suang saman dilo, luguan montiri om SPR pinungaranan sabagi ‘defendan’. -Bernama.