Apat parlimen, apat DUN id Sabah kagayat pongintongan PRU14 - Mononoriuk

KOTA KINABALU: Sokukurang apat bogian Parlimen om apat Lamin Koundangan Pogun (DUN) id Sabah kapamagayat doti pongintongan kumaa pongundi ngawi om mongingintong pulitik ontok Pomilian Tagayo Ko-14 (PRU14). diti.

Tirikohon bogian Parlimen dilo kopohompit do Semporna; Kimanis; Sepanggar; om Batu Sapi, om tirikohon DUN nopo nga kopohompit Senallang; Tambunan, Kiulu; om Sindumin.

Montok Parlimen Semporna, bagas Naib Presiden UMNO Datuk Seri Mohd Shafie Apdal ih baino Presiden Parti Warisan misaap miampai calon Barisan Nasional (BN) Datuk Ramlee Marahaban ih nogi poingigit tirikohon DUN Bugaya ontok PRU13.

Ontok PRU13, Mohd Shafie guminaga tirikohon Parlimen Semporna minomoguno tiket BN ontok dilo miampai majoriti 20,905 undi.

Tumanud mononoriuk pulitik om pensyarah wanan mantad Universiti Malaysia Sabah Dr Lee Kuok Tiung, senario politik id Sabah nokosimban noh ih nokopongintong do kinoimbulaian parti buruanan di Mohd Shafie ih nogi bagas montiri wanan id bogian Pisompuruan.

“Sundung pia Semporna tampat tagaras BN, nga, oondom ku pisaapan ontok pomilian tagayo baino diti miagal kagaras sabap alaid noh ih Shafie kuminaraja sabaagi puru Parlimen id watas dilo...iti koponokialit doti montok BN,” ka dau kumaa Bernama hiti, konihab.

Minoboros ih Lee do tirikohon Parlimen Kimanis nogi kaanu pongintongan soira calon BN Datuk Seri Anifah Aman mitoguang miampai calon Warisan ilo nopo nga veteran pulitik Datuk Karim Bujang ih nogi bagas puru DUN Bongawan, iso mantad duwo tirikohon DUN id suriba Parlimen Kimanis.

Ontok PRU13, Anifah nakamanang tirikohon Parlimen Kimanis miampai majoriti 5,723 undi.

Minoboros ih Lee do goduwo-duwo tokoh dilo au insan naala idsuang galanggang pulitik doulu noh id pomilian tagayo pogului diti, om pomilian baino diti nopo nga pisaapan koiso diolo.

Montok tirikohon Parlimen Sepanggar nopo, noboros di Lee do pisaapan agaras doti pialatan Montiri id Koupisan Luguan Montiri Datuk Seri Abdul Rahman Dahlan lumansan BN om Boyoon Wira Warisan Datuk Mohd Azis Jamman sabap goduwoduwo diolo anggapon sabaagi tulun labus id watas dilo.

Abdul Rahman mantad Tuaran, om Mohd Azis mantad Semporna, ka dau.

Minongomi potilombus, noboros di Lee do tirikohon Parlimen Batu Sapi nogi anggapon ‘alasu’ sabap sumaap calon BN Datuk Linda Tsen Thau Lin, ilo nopo nga ih Datuk V.K. Liew lumansan Warisan ih ponogi bagas kumoduo montiri Pisompuruan om bagas Presiden Parti Liberal Demokratik (LDP).

Minoboros ih Lee do nokoumbal nogi ih Liew nosiliu puru Parlimen Sandakan pogului naala kumaa calon DAP ontok PRU13, poingkuro poh nga, Linda kakaal gumaga tirikohon Parlimen Batu Sapi ontok pomilian iso’i miampai majoriti 3,798 undi.

Id suang ahal dilo, ondom nogi di Lee o ponokisaapan oporongod kopio montok tirikohon DUN Senallang ih kopongintong Shafie monokisaap miampai haro piobpinaian toiko kapanakon ih Datuk Seri Nasir Tun Sakaran ih nogi poingigit tirikhon DUN dilo.

Ontok PRU13, nakamanang ih Nasir tirikohon DUN Senallang miampai majoriti 5,909 undi.

Minoboros ih Lee do ponokisaapan dilo kagayat sabap iti nopo nga ponimbanan koiso Shafie montok mamagahau tirikohon bogian DUN Sabah.

Id DUN Tambunan, minoboros ih Lee do watas dilo nogi kopongintong do pisaapan miadi-adik pialatan calon BN Presiden PBS Tan Sri Joseph Pairin Kitingan om tadik dau Presiden Star Datuk Dr Jeffery Kitingan lumansan parti Star.

Ontom pomilian tagayo nakatalib, Pairin nakamanang tirikohon DUN Tambunan miampai majoriti 2,079 undi.

Kapamagayat nogi pongintangan nga kinampayatan Unduk Ngadau Sabah 2007 Jo-Anna Sue Henley Rampas ih haro ijazah sarjana idsuang kaganaan undangundang soira lumansan Warisan montok sumaap bagas Presiden Koisaan Monunurat Sabah Datuk Joniston Bangkuai, poingigit tirikohon DUN Kiulu ih namanang disio miampai majoriti 44 undi, ka di Lee.

Id DUN Sindumin nopo nga kopongintong do pisaapan duwo tokoh pulitik kinoiyonon ilo nopo nga calon BN Datuk Sapawi Ahmad ih nogi poingigit tirikohon Parlimen Sipitang miampai bagas bagas puru Parlimen Sipitang Dr Yusof Yacob lumansan Warisan, ka disio.

Ontok PRU13, poingigit tirikohon DUN Sindumin Datuk Ahmad Bujang nakamanang tirikohon dilo miampai majoriti 4,323 undi.-Bernama