‘Kada gadaio pogun’
# Pilion porinta ih kaanu mogowit koburuon - Musa
SANDAKAN: Pinosorou o rayat tuh au kopio papagadai do porinta om pogun diti kumaa parti gugumaga di aiso poh kamampuan montok momorinta.
Ponorikohon Barisan Nasional (BN) Tan Sri
Musa Haji Aman minoboros do ilo misuai kopio miampai koporintaan BN ih solinaid diti otopot kopio haro rikud ih tosonong id suang kararalanon pomorintaan pogun om pisompuruan.
Ka dau, koporintaan BN toririmo popogulu om monulung rayat miampai manahak mogisusuai kawo ponulungan miagal Sakadai Rayat 1Malaysia (BR1M).
“Orongou soira parti gugumaga miagal Parti Warisan Sabah om Parti Harapan Rakyat Sabah momorinta, iduon diolo toinsanan dilo.
“Nokuro tuh iduon, otopot nopo iti nopo nga ‘hak’ rayat om tantu noh ilo mositi poguluion kumaa rayat. Toinsanan diti patahakon porinta sabap ilo nopo nga tonggungan tokou montok monulung papagaan kawagatan rayat,” ka disio id Abaabayan Momuruan Guminawo Rayat id Markas Pomilian Tagayo Raan Umno Kampung Batu Putih Darat, hiti konihab.
Id suang ahal dilo, Musa ih nogi calon Lamin Koundangan Pogun (DUN) Sungai Sibuga muhang rayat apandoi kopio momili porinta ih kaanu mogowit kapangaputan om koburuon montok kopoposion di otoronong, asanang om olumaag.
“Iti otopot kopio soira nakapnaak noh ih Luguan MOntiri do poruntukan tagayo kumaa Sabah om nogi popomilo dotoou momonsoi sunsuyon, monginsonong lamin, poposodia do kapanahakan winakas lotirik om waig. Ogumu poh kagu ih maan tokou wonsoyo mantad timpu doid iso timpu montok rayat,” ka disio.
Id ramai dilo, suminaasi nogi ih Musa do abaabayan tumaru koupusan di lobi 1,000 puru raan Kampung Batu Putik Darat.
Kampung Batu Putih Darat nopo nga raan Umno id pogun diti ih haro puru nokorijisto poingguugumu ilo nopo nga kiginumu 2,691 tulun.
Otuboyokopio ih Musa kokomoi sokodung togirot rayat id kampug dilo kumaa calon ngawi BN montok Parlimen Libaran om DUN Sibuga ih tumanding ontok Pomilian Tagayo Ko14 (PRU14).
Nokotindapou nogi ih calon BN Parlimen Libaran Datuk Zakaria Mohd Edris, Bendahari Umno Libaran Datuk Salzo Asa, Boyoon Kopoilaan Umno Libaran Datuk Abdul Manap Lakariba, Boyoon Puteri Umno Libaran Karmi Ariffin om Boyoon Longkod Watas Mongundi (PDM) Batu Putih Hanif Ali Abdul Rashid.
Namot dilo, id abaabayan misusuai, pinapaharo nogi ih Musa do pinirubaan osuau miampai mogigion ngawi monginsada id Kampung Nelayan, Batu Putih, sodop Koonom nakatalib.
Id ramai dilo, minanahak sio kopointarangan tosorisid kokomoi laang porinta montok monulung popoingkawas rontob kopoposion tinimungan monginsada.
“Monginsada nopo nga pialatan tinimungan kiguno kopio montok poposodia do kotos taakanan daat montok dotoou. Mantad dilo, kotundunan diolo toririmo onuan pongintongan mantad porinta maya kapanahakan mogisusuai kawo ponulungan om subsidi,” ka dau.