Duwo tondu noduso, apat nosindualan id koligaganan
TELUPID: Duwo tondu noduso om apat nosindualan id koligaganan talun alun ih nantakan id Kilometer 17 Ralan Sandakan-Telupid, kiikira jam 12.50 tangadau ontok tadau Koonom nakatalib.
Boyoon Pulis Watas (KPD) Beluran Supt Shivananthan A/L R Velauthan minoboros do kinoligaganan dilo kopohompit do iso kurita om iso 4WD.
Ka dau, munggui ih noduso nga duwo susumakai korita, nointutunan sabaagi Majinis Anjid, 73, om tanak dau Anah Geoffrey, 48, goduwo-duwo diolo kialamat id Kampung Gambaro, hiti.
“Munggui minidu pogun id tampat kinantakan sabap noindamaan nosindualan om nagansip id suang korita sinakaian ih pinapanau songulun kusai, Amsir Domang, 57, (sawo di Anah) nogi kialamat id kampung iso’i om nakakandai nosindualan oruolan kangkab.
“Papapanau koriata 4WD, songulun tondu kiumur 46 toun om sawo dau, 73, om tanak tondu diolo kiumur 16 toun, kotolu-tolu diolo au osongkuro nosindualan,” ka dau.
Koinsanai apat munggui ih nosindualan pinaatod doid Klinik Kolidasan Telupid montok pokiubatan, om duwo ih noduso nowit doid klinik iso’i pogului tinuntut di puru paganakan.
Minoboros ih Shivananthan do asil pinonoriukan timpuuni nokoilo do natadon kinoligaganan dilo soira padsakaian kawo 4WD mantad Telupid pakaayan doid Lahad Datu natagakan kapadtamangan id tampat kinantakan, om katangkid id ponng wanan ralan om nakalanggar disan ralan.
Ka disio, kalapas nakalanggar disan ralan, padsakaian dilo mininturug nokosuang kawagu doid ralan dau miampai bogian tulu (tigulu) tumingan doid Telupid om kalanggar miampai korita dilo.
“Asil kinoligaganan dilo, duwo susumakai korita noduso id tampat kinantakan,” ka dau id iso kopoilaan.
Minoboros isio do ontok kinantakan dilo koyuon ralan om koyuon tawan nopo nga osonong om papapanau au naawuk.
Ka disio, papapanau 4WD tinaan id Balai Pulis Telupid montok ponoriukan potilombus om padsakaian dilo nogi tinaan om nowit doid Puspakom Sandakan. Kes soriukon tumanud Seksyen 41 (1) Akta Padsakaian Ralan (APJ) 1987.
Namot dilo, Boyoon Balai Bomba om Mongumolig watas Beluran, Ponulung Monguasa Bomba (PPgB) Rastam Keladi minoboros do nokotorimo o bogian dau do pamalahauan id jam 12.58 tangadau kokomoi do kinantakan dilo om nokorikot id tampat kinantakan id ajm 1.20 sosodopon.
Pinapaatod o bogian dau do iso injin songowian turu puru linuguanan di Upisor Bomba Wanan (PBK) Rosemidian Haji Majid montok papanau karaja manampasi om monulung papalabus munggui di nagansip.
“Bogian bomba minaganu timpu kiikira 30 minit montok pinapalabus munggui ih nagansip idsuang korita dilo,” ka dau ontok romuto Utusan Borneo.
Minoboros isio do koinsanai apat munggui ih nosindualan nakaatod noh di tulun tulun ginumuan doid Klinik Kolidasan Telupid pogului kinorikotan tinimungan bomba id tampat kinantakan.