‘Semporna olumaag id suriba BN solinaid diti’

SEMPORNA: Semporna olumaag id suriba ponorinaan Barisan Nasional (BN) solinaid diti om mogigion mositi papatantu do kamanangan BN id watas diti ontok Pomilian Tagayo Ko-14 (PRU14) 9 Mei diti, ka di Ponowoli Naamot Boyoon Komulakan UMNO Semporna Ahmad Marzuki Nasir.

Minoboros isio do puru UMNO om mogigion mositi gumaga do padamaan om korikohonon BN id bogian Parlimen Semporna ih solinaid diti kosoon di injin Parti Warisan Sabah (Warisan) maya ‘provokasi’ id ‘media sosial’ ih otopot do au koontok.

“BN nopo nga parti tosonong kopio montok Semporna, sabap id suriba pomorintaan BN, kotilombus tokou asanang om olumaag, osukup makan om aiso pioduhan,” ka disio kumaa monunurat abar kalapas abaabayan Datuk Seri Nasir Sakaran songowian palapa ngawi UMNO id Lamin Koundangan Pogun (DUN) Senallang hiti, konihab.

Nasir nopo nga calon BN montok gumaga DUN Senallang om saapon di Presiden Warisan Datuk Seri Mohd Shafie Apdal ih tumanding nogi id bogian Parlimen Semporna.

Pinosorou di Ahmad Marzuki o pongundi id Semporna do calon parti sumaap ih Mohd Shafie pogulu laid nakamanang id bogian Parlimen Semporna maya tiket BN.

“Sundung pia haro piromutan kapaganakan, nga montok PRU diti piromutan dilo poopion tokou pogulu laid (om potontuon BN kamanang),” ka dau.

Ahmad Marzuki id suang ahal dilo, pinoposorou injin pomilian tagayo UMNO tuh au kumadaada nung mongungkit katagadan injin calon suai katapi sumuli miampai manahak ponimbar haro kopoilaan.

“Kada tokou korosiai, mositi kiharo tokou id tampat sompori-pori, kada gumaga noopo (sulian kawagu,” ka disio. -Bernama