PRU14: Kimpin Parlimen Tuaran kohimayaan: Madius
TUARAN: Kapapanaan karaja kimpin Pomilian Tagayo Ko-14 (PRU14) Parlimen Tuaran om tolu tirikohon Lamin Koundangan Pogun (DUN) - Kiulu, Tamparuli om Sulaman okitonan kohimayaan (okon miagal ih koubasanan) natambaan miampai kinosuangon parti gugumaga do id suang tinimungan Barisan Nasional (BN) bogian dilo kalapas natagakan iyolo do kotumbayanan kumaa kopomuruanan parti sompori-pori.
Kosodop, kiginumu 250 puru PKR Parlimen Tuaran linuguanan di Kumoduo Potunud Pomilian Tagayo PKR Parlimen Tuaran Rajimit Gunong pinopoboros do luminabus parti, om konihab onom momuruan wanan Parti Cinta Sabah (PCS) pinopoboros nogi do luminabus parti om suminuang BN.
Onom momuruan wanan PCS dilo nga Speaker (Ponorikohon Atatap), Boyoon Kopoilaan om Potunud Unit Media & Komunikasi parti dilo Lesaya Lopog; Monunurat Tagayo John Hussein; puru Exco Koonduan Anita Hokum; puru Komiti Monorina Joslin Ludsum; om Ponulung Upisor Kopoilaan Hillary Gindayuk; om Boyoon Injin Pomilian Tagayo PCS Kiulu Sindin Ranggangon.
Kumoduo Ponorikohon BN Tuaran Datuk Seri Wilfred Madius Tangau ih nogi poingigit om calon BN montok tirikohon Parlimen Tuaran minoboros do sundung pia ogumu puru gugumaga suminuang BN, nga, injin pomilian tagayo potilombuson pogiroton om pawakason kagu gisom doid garisan koimpupuson ontok 9 Mei diti.
“Onom tadau noh dahai kumimpin om iti mimang iso kimpin pomilian okitonan kohimayaan (okon miagal ih koubasanan) om injin nga kobilangannogi. Sundung pia ogumu tambalut ngawi gugumaga nokosuang noh om monokodung dahai (BN), nga, au yahai mundorong om popotilombus do padamaan om nogi mongulud injin BN.
“Baino, tambalut ngawi (momuruan wanan parti PCS) uminampai dahai (BN) om minanahak yahai liwang kumaa diolo montok papanau do tonggungan sabap do sompori-pori haro kobulihan sosondiri di obuli gunoon idsuang injin dahai,” ka di Ponowoli naamot Porosiden UPKO dilo id pitimbungakan abar hiti konihab.
Minongomi puru PKR Parlimen Tuaran minaganu laang luminabus parti om suminuang BN, minoboros ih Tangau do kinosuangon diolo miampai BN tinorimo miampai ginawo poingukab om kagu nga nokotimpuun noh iyolo kumimpin montok monulung BN kapaganu do kamanangan tagayo montok tirikohon Parlimen om kotolu-tolu tirikohon DUN nokoompit.
“Injin PKR id Tuaran nakakung noh. Kumoduo Potunud Pomilian Tagayo PKR (Rajimit) pinopotingkod linimput papanau kaparagatan BN. Nokotimpuun nogi iyolo kumimpin om monulung kamanangan BN doulu noh montok mamagahau DUN Tamparuli ontok PRU14 diti,” ka disio.
Minoboros ih Madius do pomilian tagayo baino diti alansan do kaanu papawakas kagu BN doulu noh tolu parti pikoruhangan diolo id Sabah ih kopoompit do kopogisuaian tinaru doulu noh tulun ngawi Kadazandusun Murut (KDM) ilo nopo nga PBS, UPKO om PBRS montok mamalantoi koinsanai 20 tirikohon DUN om 10 tirikohon Parlimen. -Bernama