Rayat Sabah otopot kopio monokodung BN: Musa
SANDAKAN: Boyoon Montiri Tan Sri Musa Aman minoboros do rayat Sabah minoboros do tumilombus manahak sokodung kumaa Barisan Nasional(BN) ontok Pomilian Tagayo ko-14 (PRU14) diti.
Minoboros isio do ahal dilo pinoboros diolo kumaa dogo poompus kinakapan dau doid piipiro tampat id pogun diti kalapas pinumungaranan calon PRU ontok tadau Koonom nakatalib.
“Nokuro, sabap koilo iyolo koporintaan BN ih tosonong om monulung rayat sundung pia iyolo kiharo id tindal om pulou.
“Tokou (momuruan BN) haro rikud tosonong montok papanau do kotundaan montok rayat sabap tokou nopo nga porinta ih popotopot ‘janji’ ih pinatahak kumaa rayat,” ka dau id abaabayan mamabak tana Kompleks Longkod Silam Libaran hiti, konihab.
Musa ih gumaga do tirikohon Lamin Koundangan Pogun (DUN) Sungai Sibuga minoboros do rayat Sabah apandai mamagatang porinta ih kaanu manahak kowosian kumaa diolo.
Mantad dilo, ka disio, BN popotilombus padamaan papanau do kotundaan id pogun diti om moningolig nasib rayat ih ponogi agenda potilombus.
“Padamaan dilo kaanu silihon kotopotan sabap haro porinta om momuruan di tosonong toririmo mokinongou pongimbarasan rayat,” ka dau.
Namot dilo, ontok romuto monunurat abar kalapas abaabayan dilo, Musa ih nogi ponorikohon BN Sabah pinongomi laang piipiro momuruan om puru parti gugumaga id piipiro watas id pogun diti luminabus parti di kawawagu otopot ponokotanda do kopuriman iyolo do padamaan parti gugumaga au otopot.
Ka dau laang diolo manahak sokodung kumaa BN sabap do kopuriman iyolo do padamaan BN di ototopot montok rayat.
Mantad dilo, kotumboyo ih Musa do BN kaanu kalantaian tagayo ontok PRU14 diti.
Kalapas abaabayan dilo nogi, Boyoon Raan PKR Batu Sapi Mustafah Talib om Boyoon Bogian Parti Harapan Rakyat Sabah Batu Sapi Basri Ibrahim ruminuba Musa montok pinopoboros do koponokodung kumaa BN.
Mustafah songowian ngawi 1,360 puru PKR om Basri songowian ngawi 1,120 puru Parti Harapan Rakyat Sabah pinopoboros do luminabus mantad parti sompori-pori. -Bernama