‘Slogan’ gugumaga momiraag pisaan om kotoonongan rayat, ka mononoriuk

KOTA KINABALU:Pisaan tawakas parti ngawi pikoruhangan id suang Barisan Nasional (BN) lobi popotumboyo rayat piagalon piromutan gugumaga ih olunggui, popompuong om kitimungan ih mogibaababak, ka di mononoriuk pulitik Sabah.

Minoboros Abdul Jalil Ghani do koompuongan nokomoi piromutan gugumaga nokoimbulai sumusuhut haro o tolu tinimungan ih misusuai iman-imanon pulitik om iti kontodonon do pibabakan om pogioduhan di au kapanahak asil kumaa rayat om pogun Sabah.

“Mogitotondos id pialatan diolo (parti ngawi gugumaga) kontodonon doti do pisingkiwalan agama om pitinaruan, sabap iyolo minggisom doti monombirang parti ngawi ih suai.

Iti misuai kopio miampai parti ngawi pikoruhangan BN di ogirot, aiso pioduhan om toririmo momoguno do sunduan oupus tambalut,” ka dau kumaa Bernama.

Abd Jalil, lulusan sarjana Sains Politik, nogi mongomi do slogan ‘Ubah Sabah’ ih pongimbarasan di parti Warisan sabaagi ‘retorik politik’ ih popompuong kopio rayat.

Ka dau, parti Warisan nakaanu noh pinopibabak do pisaan om kotoonongan rayat Sabah sabap slogan ‘Ubah Sabah’ (Simbanan Sabah) ogumu kopohompit do pitinaruan om kaagamaan.

“Simbanan Sabah au koponguntung rayat montok timpu toniiba toiko timpu tanaru sabap ilo pinomusarahan di tulun ngawi ih haro kopontingan ih muhang monimban Sabah sabap gaab sumuli om tiwou muhang monguasa.

Porosiden Warisan, Datuk Seri Mohd Shafie Apdal, nopo nga bagas Timbang Porosiden UMNO om tinatak id suang pinonguludan kabinet sabap aiso sunduan kitimungan id suang porinta.

“Sabap tumanud ralan muhang sumaap BN, Warisan minomili slogan ‘Ubah Sabah’ sabap muhang noopo misusuai miampai slogan Gabungan Sabah ‘Sabah montok rayat Sabah’,” ka dau.

Tumanud Abd Jalil, nung intongan totootopot mantad bogian ‘kredibiliti’ om kotulidon momuruan ih muhang monimban Sabah, om iman-imanon diolo tilo otopot kopito tumanud gaab, sumuli om tiwou muhang monguasa.

“Idsuang ahal ponimbanan, rayat mositi uhoton onu mah ih kouhangan monimban nga otopot nopo pogun Sabah aandang kopio om kiharo id impoon di totopot tumingan kaangaian tosonong om koburu kalantoi,” ka dau.

Minoboros Abdul Jalil do ponorinaan toiko pomorintaan Koporintaan BN Pogun id suriba kopomuruanan Boyoon Montiri Tan Sri Musa Aman, nakaanu noh pinapaandang do ‘ekonomi’ pogun Sabah.

Paratusan komosikinan nokoinsuriba noh gisom ko 2.9 paratus. Pogun Sabah tumounda kopio om kotoonongan om kolumaagan rayat nogi ogirot, ka dau.

Kokomoi piipiro tulun ‘panangkusan’ mantad UMNO ih tuminimung id suang parti Warisan, noboros di Abdul Jalil do laang diolo dilo au kapanahak nuununu kolobian kumaa parti Warisan.

“Tulun ngawi diti nakawaya noh timpu kinalantaian om anggapon nakalid noh id suang UMNO. Opurimanan diolo o tinan diolo au kaanu monokialit miampai kinorikotan ogumu pamalapau momuruan idsuang UMNO,” ka dau.

“Kinorikotan diolo (ponongkusan UMNO) nogi pinapatantu do gaab Shafie montok monguasa kawagu om ih Shafie osotol kopio om kopuriman do momuruan ngawi ih posodia haro idsuang Warisan miagal Darrel Leiking, Terence, Junz om Jaujan au koula montok manahak asil,” ka dau.

Siningkiwal nogi di Abdul Jalil o panandasan wookon tinan kaaka do tulun ngawi Brunei notolikudan idsuang BN.

“Okon toinsanan kopokionuon tinaru obuli pogonopon maya karaja kabinet. Haro ogumu id pialatan diolo (tulun ngawi Brunei) nokoirikau noh karaja ngawi takawas idsuang kotorinaan tulun ginumuan, tinan ngawi haro undangundang om nogi komponi sanagnu porinta.

“Kagu nga, haro noh duwo tulun Brunei linantik suminiliu ‘Duta Malaysia’ id labus pogun,” ka dau.