Sawo pinatai sabap pironitan tolosok sawo nougar?
TAWAU: Pulis mogihum sawo kumaa songulun pakaraja kabun ih nokito napatai kikotumbayaan pinatai id Kampung
Murai, Kabun Kretam, Kalabakan, ontok tadau Kolimo nakatalib, miampai sabap kinantakan kikotumbayaan nontodonon kalaps pironitan tolosok tondu dilo miampai ‘suspek’ tagayo nougar.
“Tambalut ‘skandal’ tondu dilo’ ih nogi ‘suspek’ tagayo nagakom noh id kabun piasau mamau kiikira kisinodu 2 kilometer mantad tampat kinantakan asil nuhupan mogigion kampung kiikira jam 4 sosodopon.
Boyoon Pulis Watas Tawau ACP Fadil Marsus minoboros do minggisom pulis mogihum tondu dio nokomoi ih kikotumbayaan minogidu mantad lamin kalapas kinantakan nokoimamang sawo dau.
“Kakaal tokou papanau karaja mogihum sawo kumaa di napatai, ilo nopo nga songulun tondu tulun songkosuaian kiumur 42 toun,” ka dau maya kopoilaan hiti abar hiti konihab.
Minoboros Fadil do ih noduso kiumur 35 toun, om suspek’ kusai ih nagakom kiumur 21 toun om goduwo-duwo diolo rayat mantad pogun timbang om pakaraja sabaagi kuli kabun.
Tumanud dau, ruputan kinokitonan tinan munggui id koyuon poinlatan nopoju raha id suang kes dilo notorimo mantad monijor kabun ontok tadau Kolimo kiikira jam 1.15 sosodopon.
“Ih noduso nosindualan id liou, kikotumbayaan do haro waya pinonibasan kakamot atarom, om nahau tokou noh tolu tinan dangol tanaru kitukuan 70cm, 53cm om 44cm (kaamung tulu), ka dau.
Pinonoriukan timpuuni pulis, nantakan pinioduhan pialatan di napatai om ‘suspek’ soira ih sawo noilaan sopiduduwo miampai ‘suspek’ id lamin soira ih noduso minuli kiikira jam 11 kosuabon.
Minoboros isio do pinonoriukan pulis nogi nokopokito do kalapas pinioduhan dilo, ‘suspek’ minogidu minaya longobon tohuri om pinakaayan doid kabun sawit songindoros.
“Ih noduso nakakaraja noh solinaid siam toun id kabun dilo, om ‘suspek’ nopo nga wagu poh kuminaraja solinaid sontoun id kabun ih iso’i,” ka disio.
Tumanud dau, tinan di noduso nogi nakaatod noh doid linimput tinan id Hospital Tawau montok pokizazakan monoriuk, nga montok timpu diti tadau om timpu dilo au poh kaanu papatantu.
‘Suspek’ baino pinonguwungan tumanud Seksyen 117 Kanun Prosedur Jenayah (Akta 593) tumimpuun baino o ponoriukan kes nukaban maya Seksyen 302 Kanun Koinggoritan, nung katantu kasalan, obuli ukumon giwison gisom apatai.