Kada raago parti

# Toinsanan parti pikoruhangan BN pokionuon mokimaamaha do padamaan

BELURAN: Toinsanan puru Barisan Nasional (BN) id watas Beluran mositi popogulu do padamaan parti om au momiraag parti toiko calon ih tumanding ontok pomilian tagayo (PRU) baino diti.

Ponorikohon BN Sabah Tan Sri Musa Aman minoboros do sambalik dilo potitikid puru mositi mokimaamaha do padamaan parti doulu noh montok moningolig nasib rayat miampai koinsasanai.

Ka disio montok PRU14 diti, potitikid puru BN mositi monulung calon tumanding montok papatantu do kamanangan BN miampai kumaraja sabaagi iso tinimungan.

“Sundung pia haro doti tiwou otogod, okodo ginawo toiko kiharo kobolingkangan id suang parti id pialatan puru, nga ilo mositi salasaion miampai tososonong miagal iso paganakan tagayo,” ka disio id Abaabayan Momuruan Songowian Rayat id Kampung Pantai Boring Paitan doros hiti, konihab.

Nokotindapou nogi, calon BN bogian Parlimen Beluran Datuk Seri Dr Ronald Kiandee om calon BN bogian Lamin Koundangan Pogun Sugut Datuk James Ratib.

Minoboros ih Musa do ontok diti BN toririmo poinsodia minggisom kumaraja miampai monulung ‘Jalinan Rakyat (JR) om JR Plus montok papatantu BN insan poh kagu onuan kuasa momorinta pogun kalapas PRU kapanau.

Idsuang ahal dilo, Musa ih nogi Boyoon Montiri Sabah mokianu rayat id watas labus kakadaian au monorimo padamaan gugumaga ih mokimaamaha noopo ahal tinan sondiri diolo.

Ka dau momuruan parti gugumaga doulu noh id Sabah nopo nga iyolo ih au nasantaban ginawo om pinoposiliu parti sabaagi ‘platform’ montok momodimpot iman-imanon tinan sondiri.