PRU14: Kada asanang asantaban ginawo - Musa

KOTA MARUDU: Pinosorou di Montiri Komunikasi om Multimedia Datuk Seri Dr Salleh Said Keruak o injin parti Barisan Nasional (BN) tuh au asanang asantaban ginawo miampai kinodimpotan kimpin diolo mamalantoi ginawo pongundi gisom baino diti katapi popotilombus do ‘momentum’ kimpin montok papatantu do kalantaian BN ontok pomilian tagayo diti.

Salleh ih nogi Bendahari UMNO minoboros do pulitik okon saba-baa pomilian tagayo om kumimpin katapi ino nopo nga padamaan moningolig nasib rayat solilinaid, au pointantu id suang timpu limo toun kalapas kamanang pomilian tagayo om kapaganu kuasa.

“Tolu tadau poh orikot timpu Pomilian tagayo ko-14, injin parti mositi kotilombus ogirot, uludon, pawakason om pagarason montok maganu kawagu Matunggong om kalapas dilo kopongonggom kamanangan tagayo id Parlimen Kota Marudu.

“Ih kiguno, mogisosokodung tokou miampai rayat, monorina poimponu koiyonon miampai tososonong tuh ino osiliu igitan ogirot rayat montok tumilombus momili BN ontok 9 Mei om ontok tumpu rumikot,” ka disio.

Noboros di Salleh ahal dilo ontok minanahak boboroson id abaabayan Mogirurumoh Songowian Momuruan ih lobi 1,500 mononokodung BN id Dewan Serbaguna Matunggong doros hiti konihab.

Nokotindapou nogi ih sawo Salleh, Datin Seri Raya Erom, calon BN Parlimen Kota Marudu Datuk Seri Dr Maximus Johnity Ongkili, calon BN Lamin Koundangan Pogun Matunggong Julita Mojungki, Boyoon UMNO Bogian Kota Marudu Datuk Wetrom Bahanda om bagas ADUN Matunggong Datuk Jelani Hamdan.

Namot dilo, pinosorou di Salleh o rayat tuh au asanang otombirangan miampai batos ngawi au ‘rasional’ gugumaga.