Iloon parti nonggo obuli mogowit kotundaan kumaa rayat: Musa
NABAWAN: Rayat mositi koilo parti nonggo ih obuli mogowit kotundaan kumaa rayat pogului diti.
Boyoon Montiri Tan Sri Musa Aman minoboros do porinta ih binoyoon Barisan Nasional (BN) okito kopio kapanahak do mogisusuai ‘insentif’ ponulungan om kotundaan kumaa rayat id pointongkop pogun diti miamapi au mongira bansa om agama.
Ka dau, nung rayat insan poh kagu manahak kuasa kumaa BN ontok PRU14, ilo nopo nga iso pamagatangan tagayo kumaa boyoon momuruan BN ih kalapas dilo minggisom manaan karaja miampai ‘komited’ montok rayat id pogun diti.
“Iti otopot kopio miampai onu ih naanu rayat baio diti ih ponogi asil karaja koinsanai kopomuruanan BN montok papatantu rayat au oiduanan mantad nunu noopo kotundaan di pokigunoon kopio kaanu popotilombus,” ka dau.
Noboros disio ahal dilo ontok minanahak boboroson pinotimpuun do ‘Majlis Jerayawara’ Yayasan Sabah Songowian Rayat bogian Zon Pedalaman Utara, Karnival Kerjaya, Kopongindapuan om Mobile CTC, hiti konihab, ih notindapou lobi 5,000 tulun.
Id ramai dilo, pinapatahak nogi ih Musa do garan komunal kuminaa kiginumu
617 boyoon paganakan mantad 16 kampung id watas diti kopohompit do kinalaabon tana 9,700 ekar.
Garan komunal dilo nopibahagi kumaa duwo tinimungan ilo nopo nga Tagol 1 kopohompit do onom kampung miampai
140 boyoon paganakan om kalaabon 700 ekar, om Tatalaan 2 kopohompit do 10 kampung (477 boyoon paganakan) miampai kalaabon 9,000 ekar.
Pinapatahak nogi ih Musa do kiginumu 225 garan Pantas kumaa turu kampung, 161 garan N.T/F.R kumaa 30 kampung om subsidi Pantas kumaa 40 ponorimo ih kigatang RM80,000 hinonggo potitikid ponorimo kaanu subsidi RM2,000.
Nokotindapou nogi id ramai dilo nga ih Montiri id Koupisan Luguan Montiri Tan Sri Joseph Kurup, Puru Lamin Pogun Senator Datuk Abdul Ghani Yassin, Kumoduwo Potunud Yayasan Sabah Datuk Hajah Rosmawati Hj Lasuki, Upisor Watas Nabawan Fredian Gan, calon BN P182 Pensiangan Arthur Joseph Kurup, calon BN N38 Nabawan Datuk Bobbey Suan om calon BN N37 Sook Datuk Ellron Alfred Angin.