Lobi 300 puru mononokodung Warisan luminabus parti om monokodung BN
SEPANGGAR: Lobi 300 puru om mononokodung Parti Warisan Sabah (Warisan) mantad Longkod Watas Mongundi (PDM) Kolam Air hiti, konihab luminabus mantad parti dilo om pinapatantu do sokodung diolo kumaa Barisan Nasional (BN).
Moboboros tinimungan dilo, Martin Malubi ih nogi puru Komiti Warisan Bogian Sepanggar, minoboros do minaganu iyolo laang tuminongkiad Warisan sabap kopomuruanan parti dilo minomungaran do calon okon tulun totopot Sepanggar Datuk Azis Jamman id bogian dilo ontok Pomilian Tagayo Ko-14 (PRU14).
“Totopot nopo, yahai haro pisuaian pomusarahan (kokomoi pomilian calon). Osomok duwo toun noh dagai pinopotounda Warisan Sepanggar. Haro noh boyoon bogian dagai, haro noh komiti bogian dagai. Nga, montok pomilian calon okon boyoon bogian dagai.
“Om (calon) okon tulun totopot Sepanggar. Yahai toinsanan au nasantaban ginawo,” ka dau kuminaa monunurat abar hiti, konihab.
Id suang ahal dilo, kumimpin isio monulung calon BN Sepanggar Datuk Seri Abdul Rahman Dahlan montok papatantu do kamanangan dau ontok PRU ontok Mei diti.
Kokomoi slogan ‘Ubah’ (Monimban) ih asaasaru pongimborosan Warisan, ih linuguanan di Datuk Seri Mohd Shafie Apdal, noboros di Martin do aiso nodi nunuunu ih minog simbanan sabap calon BN timpu diti osonong kopio om notorimo miagal ih kouhangan pongundi Sepanggar.
Uhoto kokomoi Abdul Rahman ih okon mantad Sepanggar, noboros di Martin do calon BN dilo natadon mantad Tuaran ih misampaping miampai Sepanggar piagalon di Azis ih natadon mantad bogian kosilahon Sabah.
“Lamin Abdul Rahman nga poinsuang bogian Parlimen Sepanggar, om, asanang kopio montok rayat montok mokitorina karaja miampai disio tiinu,” ka dau.
Kokomoi kohibokan pulitik kalapas diti, minoboros ih Martin: “Au poh yahai papatantu parti nonggo ih tonudon dagai. Momonsoi yahai kapatantuan kalapas pomilian tagayo tiinu.” - Bernama