Sokodung rayat kumaa BN kakaal agaras - Salleh
KOTA BELUD: Bendahari UMNO Datuk Seri Dr Salleh Said Keruak kotumboyo sokodung rayat kumaa Barisan Nasional (BN) id pointongkop Sabah kakaal agaras.
Montiri Komunikasi om Mulmedia ih nogi calon BN montok tirikohon Parlimen Kota Belud minoboros do poingkuro poh nga iti okon komoyon do injin parti BN Sabah obuli kumadada, katapi mositi tumilombus kumaraja montok papatantu kamanangan lobi tagayo BN id pogun dilo.
“Nokosiwat oku kuminakap watas id Sabah montok mongintong ningkokoton koinsasanai BN id Sabah...om okito ku sokodung rayat kumaa BN kakaal osonong. Mantad dilo tantu noh do kaanu tokou doti kamanangan ontok Pomilian Tagayo Ko-14 (PRU14) diti,” ka disio.
Noboros disio ahal dilo kuminaa monunurat abar kalapas pinapaharo do pinirubaan songowian pongundi tulun ngawi Sina id Kampung Tombol doros hiti, konihab.
Nokotindapou nogi ih Potunud Injin Papanau Watas Mongundi Sumu Tinaru Sina Kota Belud Ting Hoei Ming.
Minoboros ih Salleh do sokodung tulun ngawi Sina id Kota Belud kumaa BN maidlaid osonong sabap koilo iyolo om karati do bulun noh koporintaan BN ih kaanu papatantu do kotundaan id watas dilo kotilombus papanaon.
“Ounsikou oku sabap ontok baino diti okito tokou okon noopo pongundi laid ih monokodung tokou nga nakaanu tokou nogi sokodung mantad tinimungan tomulok id pialatan tulun ngawi Sina,” ka dau.
Id suang ahal dilo, pokionuon di Salleh o toinsanan injin BN id bogian Parlimen Kota Belud, doulu noh injin parti BN id suang tulun ngawi Sina, tuh tumilombus monginduwo kagarasan injin somporipori om papatantu do mononokodung BN lumabus tosisikap mongundi ontok tadau Kotolu diti.
“Mositi potontuon tokou pongundi BN lobi osikap lumabus montok popoturuk tonggungan sompori-pori om manahak do sokodung poimponu kumaa parti momorinta,” ka disio.
Namot dilo minongomi pinongintongan dau id Tamu Minggu Kota Belud di kosuabon konihab, minoboros ih Salleh do karati o bogian dau miampai au asanang o moniaga ngawi id pasar dilo sumusuhut projik popoinggayo ih masaon papanaon.
“Pokionuon ku upis watas montok papatantu do tapak tamu naamot dilo kaanu papatantu kapasanangan.
“Okito tokou ogumu ih mositi umbasian om mogiboboros oku miampai bogian Konsol Watas Kota Belud montok papatantu do watas dilo lobi asanang sabap tamu dilo kiguno montok moniaga...do hilo mogihum iyolo kaakan-akanon kopoposion om tokou sabaagi porinta momorinta papatantu do kapasanangan moniaga ngawi,” ka disio. -Bernama