Kimpin PRU14 BN Labuan oulud - Rozman
LABUAN: Calon Barisan Nasional (BN) Labuan Datuk Rozman Isli nasantaban ginawo miampai osonong kopio kapapanaan kimpin Pomilian Tagayo Ko14 (PRU14) ih pinapanau injin parti.
Minoboros isio do kimpin BN Labuan baino diti nopo nga lobi oulud om napalan.
“Alhamdulilah, okito ku pangaramitan kopongunsub kopio mantad mogigion Labuan potitikid timpu manahak boboroson BN pohoroon id potitikid kampung toiko id bogian Longkod Watas Mongundi (PDM),” ka dau id pitimbungakan abar kalapas pinapaharo do kakapan doid Bilik Gerakan PRU14 Koupisan Kopoilaan Labuan id Linominon Ujana Kewangan hiti, konihab.
Minoboros isio do injin parti ngawi suai ih tumanding nogi kumimpin id koyuon otoonong om oulud sundung pia tirikohon Parlimen Labuan kotoguang ponokialitan apat ponjuru.
Ontok uhoto do obuli nangku BN kamanang miampai majoriti di lobi tagayo id Labuan timpu diti, kotumboyo Rozman ilo kaanu poposigampot sokiro ko paratusan mongundi lobi akawas piagalon PRU13.
“Alansan oku BN Labuan mositi kamanang miampai majoriti di lobi agayo...mogigion ngawi Labuan mositi momonsoi pilion tosonong kopio miampai maganu kokiraan kangai-angaian tosonong koporintaan BN di ogumu minogowit mogisusuai projik kotundaan montok kolumaagan diolo,” ka disio.
Id kinakapan dilo, pinotimpuun nogi ih Rozman do Longkod Media PRU14 Koupisan Kopoilaan Labuan ih nukaban mantad podi tadau pinungaranan calon wulan nakatalib.
Longkod Media dilo ukabon tumimpuun jam 8 kosuabon gisom jam 10 dongotuong poompus timpu 11 tadau kumimpin PRU14. -Bernama