BN noh kaanu mogowit ponimbanan - Sapawi
SIPITANG: Nung gulu poh Sipitang nointutunan sabap haro o Sabah Forest Industri (SFI), nga baino watas ih kiharo kipiwolitan miampai Lawas, Sarawak baino nointutunan sabaagi iso mantad watas id pogun diti ih tuminimpuun tuminunda om nokosigampot koburuon.
Kinotutukon dilo, Sipitang osodu nodi kinosimbanan om au nodi nointutunan montok rayat pogun diti noopo nga montok rayat mantad Sarawak, Semenanjung om Brunei nogi.
Toinsanan dilo natadon do karaja ih potilombus mantad nuludan kopomuruanan di au insan apaasan toiko kopuriman lumangkab tiwou montok monimban watas dilo.
Soira nopo talun alun Sipitang pakaayan doid Beaufort notiir, rayat Sipitang minomili lansanon rayat diolo mantad Barisan Nasional (BN) otopot kopio au magandad timpu di alaid montok papanau do iman-imanon toiko gaab monimban Sipitang kumaa iso watas di tumounda om koburu.
Lansanon rayat Sipitang (Sindumin ontok diri) Datuk Sapawi Ahmad tuminimpuun laang miampai pinapaharo Karamaian tubau om Tamu (GATA) Sipitang.
Otopot kopio GATA ih pinointutun nakapanahak asil tosonong kumaa Sipitang. Okon minongukab kosiwatan kumaa rayat montok popoingkawas konuonuan (ekonomi) noopo nga pinopomilo Sipitang tinimpuunan nointutunan om ninsomokan rayat mantad pointongkop pogun diti, Semenanjung, Sarawak, Labuan om nogi Brunei.
Iso iso tinimpuunan pinointutun id Sipitang kalapas GATA om okuudi ogumu minonimban watas diti ih gulu poh nointutunan miampai SFI kumaa watas di haro kobulihan kopio montok tumilombus koburu omkotounda.
Sapawi ih pinoingkakat kawagu ontok Pomilian Tagayo Ko-14 (PRU14) maya tiket BN pinopointutun GATA miampai tujuan popoguli do kinobontugan Sipitang id kaganaan sipoot tubau om nogi minonulung minongukab liwang kumaa rayat montok manamba kotos konuonuan sompori-pori maya poniagaan.
Poingkuro poh nga, waya asil mantad GATA dilo nokopongukab kobulihan Sipitang ih pogului diti au osongkuro nointutunan ilo nopo nga id kaganaan ponombuluian. Sipitang tinimpuunan rinikotan di tutumombului labus om suang pogun.
Mongintong kolumison Sipitang ih kakaal kiharo tana otomou om nogi koubasanan suku tinaru. Nga, iso ahal ih au doti noilaan do GATA nakaanu pinoposompuru rayat Sipitang mantad mogisusuai suku tinaru om tonudon agama.
“Kolumaagan om kotoonongan montok rayat Sipitang baino diti tantu noh kopongunsikou kopio om iti popomilo do toinsanan rayat kapaganu kotoonongan ih pininggisoman mantad BN,” ka Sapawi.
“Miampai au muhang manapap kangkab, calo BN montok tirikohon DUN Sindumin dilo mioboros do rayat Sipitang orohian momili kolumaagan, om kotoonongan.
Ka disio laang gugumaga ih kuminam papalasu do pitinaruan tantu kopio au torimoon om au doti kaanu tampat id ginawo rayat.
“Rayat koilo om kopuriman kopio do BN noh kaanu mogowit ponimbanan om koburuon...rayat kaanu mintong Sipitang osodu nodi kinosimbanan om koilo laang ih wonsoyon mantad BN nopo nga potilombus,” ka disio.
Kotundaan ekonomi rayat id watas diti nogi kiasil miampai osonong kopio soira koporintaan BN minogowit suminuang projik tumau om gas id Sipitang suai ko Samur. Projik dilo okon mongukan kosiwatan kumaa rayat mantad ahal pakarajaan noopo nga nosiliu kiguo montok mamagayat papaapu doid watas diti.
Minomisuud ih Sapawi do panandasan gugumaga do Sipitang aiso kinosimbanan nopo ngapanandasan ih nokorikot mantad momuruan ih tototopot au insan mindahu gana om minsomok rayat.
Ka disio momuruan dilo mimbulai noopo ontok timpu pomilian tagayo hinonggo pogului diti au insan momoduli rayat.
“Otubayaan oku rayat Sipitang opurokis kopio montok momonsoi pamagatangan om tumilombus manahak sokodung kumaa BN sabap iyolo muhang do kotundaan om koburuon di potilombus,” ka disio.
Nokotindapou nogi id kinakapan doid Longkod Watas Mongundi (PDM) kaamung noh Calon P.178 Sipitang Yamani Hafez Musa, Boyoon PBS Sipitang Senator Datuk Jamilah Sulaiman, Boyoon Upko Sipitang Datuk Pangiran Lalung, Boyoon PBRS Sipitang Pius Ganang om Boyoon Popisamo LDP Sipitang Lee Chun Kuang.