Ada sokodungo gugumaga : Najib
# Momihi parti ih tinuidong montok angkab sosonguhun nopo nga momiubat noopo
BEAUFORT: Pinosoou di Datuk Seri Najib Tun Razak o layat, hoohobi id Sabah, tu au monoimo toi monokodung parti gugumaga sabap miampai momihi parti ih tinuidong montok angkab sosonguhun nopo nga momiubat noopo.
Nga, ka huguan montili, layat mositi tumihombus manaak kuasa doid Barisan Nasional (BN) sabap padamaan dosido otopot montok kogunoon layat.
Parti gugumaga ih baino ih binuu’an di Tun Dr Mahathir Mohamad ih sohinaid 22 toun nadadi huguan montili, au minog pihion layat sabap suvai ko isido momuu’an pusingon mahik, isido nogi au ogumu minanaan kotoinaan tavasi doid layat Sabah poompus nadadi huguan montili.
“Onu guno tokou mimang tuhun nokopinsin (Dr Mahathir). Tuhun nokopinsin au nodi oupus doid tuhun Sabah. Idsuang kimpin 11 tadau diti, au isido minikot do id Sabah. Nokuo au isido minikot id Sabah. Sabap isido au ogumu minanaak kotoinaan tavasi doid tuhun Sabah.
“Kakaal po osoou tuhun Sabah. Au ohiivan do tuhun Sabah. Ih asanang ohiivan isido. Nga tuhun Sabah kakaal kosoou po. Isai ih oupus doid Sabah Najib toi Dr Mahathir?,” pogudizaan huguan montili ih sinimba miampai opuod mantad nokotindapou - ‘Najib’.
Noboos di Najib ahal dino ontok minanaak bobooson id Abaabazan Songovian Layat id Dataran Bagandang, doiti koniab.
Nokotindapou nogi ih Kumoduvo Vozoon Montili Sabah Tan Sri Joseph Pairin Kitingan, Kumoduvo Montili Kotundaan Koonduan, Paganakan om Layat ih nogi calon tiikon Parlimen Beaufort Datuk Azizah Mohd Dun, calon BN tiikon Hamin Koundangan Pogun (DUN) Klias Datuk Isnin Aliasni om Datuk Limus Juri calon BN DUN Kuala Penyu.
Tumanud Najib ih nogi Polosiden UMNO, layat nogi au minog momihi parti simbol kapal layar (Parti Warisan Sabah) sabap montok maza kadaatan samudera ih kihakun, layat momoguno do kapal tagazo om doung kavavagu.
“Iso vagu, parti kapal layar. Timpu baino au tokou mamain kapal layar. Pougadan tokou doid kadaatan samudera, mimang tokou kapal doung kavavagu. Kapal layar ti oniini. Mamain id tisan daat noopo. Zotokou diti parti ih tagazo. Parti mantad Perlis gisom do id Sabah.
Muhot zou doid diozu ngavi, nung mugad doid kadaatan samudera, momihi tokou kapal layar toi mimang momihi kapal tagazo, kavavagu om noponu miampai kokuatan? Pogudizaan Najib om hinusian di nokotindapou ngavi ‘Barisan’.
Nuhit vagu di Najib o tonggungan dau montok popotounda Sabah ih au pinoduhi ‘di bagas huguan montili ih minonguasa sohinaid 22 toun.”
Ka disido ontok huguan montili dino nokomoi kikuasa, atag monoodo Talun Alun Tagazo Pan Borneo au tinoimo nga projik dino nookunan ontok timpu disido (Najib) om nogi Talun Alun Tagazo pan Borneo aiso ‘tol’ piagahon talun alun poingguugumu ‘tol’ ontok timpu bagas huguan montili dino.
Pinosoou nogi di Najib o layat tu miingatingat om au otumbozo miampai abal pilasu toi au otopot ih ogumu pinotikid touvi no diti montok papalaat ngavi polinta kaamung kaaka do polinta baino nobingkalap.
“Ada kinongoo abal pilasu sabap ogumu abal pilasu baino ih pinalayat kaaka do pogun tokou diti nobingkalap. Iho nga au otopot.
“Tutang pogun tokou 50.8 piatus no mantad Kahabusan Suang Pogun Omumuk (KDNK) pogun. Nokuo au pinongudizaan timpu disido. Nokuo monombilang baino diti>” pogudizaan disido.
Minoboos huguan montili do tutang pogun Jepun nga 235 piatus mantad KDNK pogun dino, Singapura nopo nga 110 piatus mantad KDNK pogun dino nokomoi om United Kingdom nopo nga 85 piatus mantad KDNK dau.
Sabap dino, ka Najib, Malaysia okon pogun au nakahantoi toi nobingkalap sabap ekonomi pogun diti nakaanu minonoina miampai tavavasi mantad kopolintaan BN.
Id abaabazan dino, noboos nogi di Najib do kivaa poluntukan RM15 lizong montok boogizan Parlimen Beaufort montok panadaan kounahan ngavi kiguno layat id uvang dino.