Lobi 2,000 tampat mongundi rikoton di lobi soriong pongundi Sabah, Labuan

KOTA KINABALU: Kiginumu 2,141 tampat mongundi id Sabah osiliu rikoton di 1,093,081 pongundi nokorijistor tumimpuun jam 8 kosuabon suab (baino) montok Pomilian tagayo Ko-14 (PRU14), om 26,042 pongundi id Labuan mongundi id 51 koiyonon mongundi.

Potunud Tinan Monorina Pomilian tagayo (SPR) Sabah Rohiman Sahia minoboros do ginumu pongundi dilo au kaamung pongundi nokopogulu om pongundi pos om pongundi au korikot ontok tadau pongundian.

“Koposodiaan montok tadau pongundian suab (baino) masaon kapanau tososonong. Momoguno yahai kotorinan helikopter montok poposonong karaja id 10 bogian Parlimen id Sabah om kotorinaan bot montok 58 longkod mongundi id bogian labus kakadaian.

“Ajangka nogi dagai duwo longkod mongundi maan tutubai tosisikap ilo nopo nga jam 11 kosuabon sumusuhut ginumu pongundi di okoodo ilo nopo nga Sikul Kabansaan (SK) Tiang id N31 Paginatan om Balai Raya Kampung Mangkasulap montok N39 Sugut,” ka disio kumaa Bernama ontok romuto hiti konihab.

Tumanud Rohiman, kiginumu 19,792 pakakaraja SPR pinoiyon id Sabah om 458 id Labuan kopohompit do kiginumu 810 longkod mongundi montok monorina kopoindalanan pomilian tagayo kopohompit 25 tirikohon parlimen id Sabah om 60 tirikohon Lamin Koundangan Pogun (DUN) om iso tirikohon parlimen id Labuan.

Ontok PRU14 timu diti, Sabah haro 1,117,337 pongundi nokorijistor, om 28,356 pongundi nokorijistor id Labuan.- Bernama