Rela mositi papanau karaja miampai noponu tonggungan: Juhari
KINABATANGAN: Pinosorou o puru Rela tuh papanau do karaja ih pinatahak kumaa diolo miampai noponu tonggungan sabap iyolo nopo ponoko mato om tolingo porinta om nogi mintamong kotoonongan om koumoligan pogun.
Ponulung Pesuruhjaya Wanan (Kehormat) Rela Dato Juhari Janan nogi pinoposorou kumaa puruRela tuh mintamong ‘disiplin’ di takawas sabap iyolo nogi osiliu pomitanan kumaa tulun ngawi doulu noh soira poimpakai iyolo rasuk ‘uniform’ tinimungan dilo.
Noboros disio ahal dilo ontok tuminindapou Abaabayan Rela Songowian Momuruan Bogian Watas Kinabatangan id Dewan KOPEL Kampung Mangaris Batu Putih, hiti.
Minoboros Juhari, baino puru Rela okonnodi miagal gulu poh ih mintamong kotoonongan id kampungkampung noopo nga baino puru Rela nogi kohompit id nuludan tigulu montok mintamong koumoligan pogun.
Pokionuon nogi disio o puru Rela mooi ontok papanau karaja miampai tototopot om haro koulalahon ginawo di olidas (disiplin) ontok Pomilian Tagayo Ko14 (PRU14).
“Sabaagi puru Rela ih ogumu nakaanu mogisusuai kounalan mantad porinta tantu noh do gumaga tokou porinta ih posodia haro, sabap porinta baino otoonong, olumaag sundung pia tokou kaampai mantad mogisusuai suku tinaru,” ka disio.
Id ramai dilo, pinapatahak nogi ih Juhari do pakaian ‘uniform’ kuminaa puru ngawi Rela. Nokotindapou nogi Upisor Rela Watas Kinabatangan Ismail Talib om wakil OCPD Kinabatangan ASP Marcos Ahdy Lawrehce.