DUN Katibas agi tinggal pemansang: Paren
KUCHING: Kandang menua dalam sitak Kunsil Nengeri ( DUN) Katibas kelebih agi di menua ulu bedau serap ngasaika pengerembai pemansang.
Nitihku Ketuai DAP Pampang Katibas, Paren Nyawi madahka sitak nya ti diarika pengari Barisan Nasional (BN) betapi enggau mayuh projek ke tejanggal ti bekaul enggau sekula sereta projek pemansang ke bukai.
“Taja pan DUN Katibas ti udah enam penggal diarika pengari rayat BN tang agi mayuh pemansang ke bedau datai ba kandang menua ulu sitak tu.
“Nambahka nya, mayuh projek ti dipejalaika sebedau tu tejanggal baka Sekolah Menengah Kebangsaan Song 2, Stesyen Betanam Betupi Nanga Engkuah, penanggul Bekal Ai Beresi di Pasar Song, Jalai Temalat (Song) ke Nanga Ngemah (Kanowit) ti agi putus nyentukka diatu, kelimpah ari pengurang kereban pengerai ngujungka sekeda kes penusah ngenyit dianjung ke Sepital Kapit tauka Sepital Sibu,” ku iya nengah penerang berita.
Dalam penerang berita ngagai Utusan Borneo, Paren ke nyadi Pemantu Khas Kaban Parlimen Sibu madahka BN kurang bebendar deka mai pemansang di kandang menua pesisir nengeri tu.
Iya madahka sebedau Pengawa Bepilih Nengeri (PRN) Sarawak apin lama, perintah BN Sarawak bisi ngungkupka geran Projek Mit Pemansang Menua Pesisir (MRP) ngagai rumah panjai lalu Kaban Parlimen Kapit diatu benung nyerahka geran perintah ngagai gerempung dalam sitak parlimen nya.
“Tang nya semina ‘sagu ati ngagai pengundi’ sebedau pengawa bepilih ti enggau juluk dikena narit undi ba Pengawa Bepilih Besai Menua (PRU) ila.
Paren madah, ke nyadi nyata iya nya Kapit kandang menua pesisir ke agi enda dikeibuhka BN sereta agi jauh tinggal ba pemansang sosioekonomi.
Pengari rayat ba sitak parlimen Kapit, iya nya Datuk Alexander Nanta Linggi enggau Kaban Kunsil Nengeri (ADUN) Katibas , Datuk Ambrose Blikau.