Gempuru ‘Kenarau 3’ nerima sukung ke chukup manah ari mensia mayuh
MIRI: Gempuru Besai Kelinggai Antarabansa Sarawak 2016 tauka ‘Kenarau 3’ ke diatur ba Stadium Tertutup Miri nerima sukung ke chukup manah ari mensia mayuh.
Gempuru kenarau 3 tu nyadi gempuru pemadu besai diatur Sarawak Body Arts Association (SBAA) ditu pengelama tiga hari berunggu.
Presiden serakup nya, Felix Dixon, timbal diterima ari mensia mayuh ba hari keterubah aja udah mujur matak lebih 2,000 iku temuai.
Felix mansutka jaku tu ngagai Borneo Post pengudah pengawa bejadika gempuru ti udah dipenyadika Kaunsilor Ong Chee Yee.
Kaunsilor Ong ngarika Kaban Kunsil Nengeri (ADUN) Piasau Datuk Sebastian Ting bejadika gempuru nya.
Ong dalam jaku dipansutka madahka gempuru tu mai reti ke chukup besai dikena ngelakuka kelinggai nyadi seni batang tubuh.
“Kelinggai tu ukai semina sebagi ari pengawa asal ngagai sekeda raban bansa laban kemaya hari tu nyadi seni batang tubuh ngagai sida ti rinduka iya.”
Iya ngarapka serakup tu deka ngena gempuru tu nyadika pelasar dikena ngelakuka pemanah enggau pengelebih seni kelinggai Sarawak.
Pengudah nya ba program ke sebaka, iya ti ngarika Ting bisi ngemendarka geran perintah penyampau RM3,000 ari baruh belanja Projek Mit Pemansang Menua Pesisir (MRP) ngagai serakup nya.
Lebih 100 artis kelinggai enggau studio datai ari dalam enggau luar nengeri nyereta gempuru ti berengkah diatur Hari Lima tu tadi.
Sekeda ari artis enggau studio kelinggai ari menua luar ke bisi datai iya nya ari Indonesia, Brunei Darussalam, Singapore, Thailand enggau Italy.
Sida tu iya nya Jimmy Wong Legend Tattoo (Thailand), Marco Leoni (Italy), Dirty Little Fingers (Singapore) enggau Azlan Bala (Brunei Darussalam) sereta mega lapan iku ke bukai ari Indonesia iya nya Arie Selah Tattoo (Jakarta), Glory Family Tattoo Studio (Bekasi of West Indonesia), Iwanspeank Tattoo (Jakarta), Vina Tattoo Gallery (Bali), Ma Tattoo (Bali), Nabella Professional Tattoo Artist, Venomous Tattoo enggau Prim Ferry Tattoo Studio.
Pesereta ari menua tu datai ari Sabah, Wilayah Persekutuan Labuan, Semenanjung Malaysia sereta mega Sarawak empu.
Presiden Indonesia Subculture (ISC) Ucha Cyberbog bisih dikangau khas ngulu gempuru tu mantaika seni ‘ngangkatka tubuh’.
Kelimpah ari bansal mandangka kelinggai, iya madah mayuh macham aktiviti udah dilangkar ungkup program tiga hari berunggu nya.