Tim main bol ari Sibu diperansang nyereta Pekit Main Bol 9 Sepiak kena 29-30 Okt tu
SIBU: Ivan Cafe ba Taman Permai ditu deka ngatur Pekit Main Bol 9 Sepiak kena 29 nyentuk 30 Oktober tu ba Padang Jil Sibu, Jalai Awang Ramli ditu.
Sapit Presiden Gerempung Main Bol Sitak Sibu (SDFA) Mejar (B) Moses Ripai madah, pekit tu tebuka ngagai semua tim main bol sitak tu kelimpah sida ke besemak ke bukai.
“Pekit tu diatur kitai dikena nyidi sereta ngangkat pengelandik bala nembiak ba sitak tu.
“Kebuah pia, laban kitai nemu sitak tu mega mayuh orang ke landik bemain bol tang enda nemu dini paltform ke engkeman alai sida bemain,” pia ku iya madah ngagai pengarang berita, kemari.
Iya ti mega beempu Ivan Cafe madah, champian pekit tu deka mai perais mata duit RM1,000 sereta disempulang trofi enggau midul lalu pe- nuduk lumur dua mai perais mata duit RM500 sereta bela disempulang trofi enggau midul.
“Penuduk lumur tiga deka mai perais mata duit RM300, trofi enggau midul,” ku iya sambil madah semua perais nya dipelanja Ivan Cafe.
Pekit tu dipelabaka deka ngena sistem ‘Liga’ tang agi nganti penyampau tim ke ngambi bagi.
Bayar ngambi bagi ba pekit tu iya nya RM250 seiti tim lalu pengawa nganjung nama tim enda laun ari 28 Oktober tu.
Pengawa nyabut undi bela diatur kena 28 Oktober pukul 4 lemai ba endur ti deka dipadahka nangkan ke tu ila.
Penerang silik tau ditanya ngagai Moses nengah lumur 019- 4388306 tauka Tony Karno (014-5975250).