Kemeranka ulah ‘nyulut seumur idup’ maya belajar
Raban nembiak MRSM diperansang ngemeranka ulah tu ngambika ulih nyamin pengidup sida jemah
BETONG: Bala nembiak Maktab Rendah Sains Mara ( MRSM) Betong diperansang ngemeranka ulah ‘nyulut seumur idup’ dikena nyamin pengidup sida jemah.
Kaban Kunsil Nengeri ( ADUN) Layar, Gerald Rentap Jabu mansutka jaku tu lebuh iya nyadi temuai dipebasa rambau pengerami graduasyen ketujuh kolej nya kena Hari Enam tu tadi.
Iya madah taja bala nembiak nyangka nyulut serak tu, sida patut sedar pejalai dalam nyapai mayuh agi penyulut ba pelajar agi jauh.
Iya berasai temegah ati lebuh dipadahka naka ke diatu bisi lima iku nembiak sebedau tu udah ngayanka penyulut ba pemutus peresa sida.
Peresa nguji enggau ba tikas semester, iya ngarapka sida tu deka ransing agi dalam peresa Sijil Pelajaran Malaysia (SPM) ke deka datai, ku Rentap madah nyemetak.
Chukup andal ngagai bala nembiak sedar nama peminta dikena nyapai penyulut dalam pelajar, iya madahka sida patut meri perati khas ba penau dalam jaku English.
“Kita patut landik dalam jaku English dikena nangkup peminta kelebih agi ba jeman kemaya hari ti kitai meseti nyikap diri enggau mayuh penemu nyengkaum ba bidang sains enggau teknologi ngambika kitai ulih besemekih tauka bisi penau ngereja pengawa ba sebarang sektor ba renggat dunya,” ku iya.
Iya pechaya nya kebuah perintah Barisan Nasional ( BN) seruran ngemeratka pekara pelajar nyadi agenda dalam program pemansang, ku Rentap, seraya nambah, ninting taun sektor pelajar udah diagih belanja ke besai.
Nampung pengawa apai iya, ex-Sapit Kepala Menteri, Datuk Patinggi Tan Sri Alfred Jabu ti udah numbuhka MRSM Betong lalu nyadi
Kita patut landik dalam jaku English dikena nangkup peminta kelebih agi ba jeman kemaya hari ti kitai meseti nyikap diri enggau mayuh penemu nyengkaum ba bidang sains enggau teknologi ngambika kitai ulih besemekih tauka bisi penau ngereja pengawa ba sebarang sektor ba renggat dunya. Gerald Rentap Jabu ADUN Layar
pelasar ngangkatka penyulut pelajar di Betong.
Berebak enggau nya, Rentap bisi ngemendarka belanja penyampau RM20,000 ngagai Gerempung Apai Indai enggau Pengajar ( PIBG) sekula nya lalu besemaya deka meri mayuh agi belanja dudi hari.
Rambau pengerami nya, Rentap diberi basa nyuaka setipikit graduasyen ngagai 106 iku nembiak ti deka nembuka pelajar sida ba kolej nya sereta deka napi peresa SPM ujung bulan November tu.
Prinsipal MRSM Betong, Mohd Zaki Ab Rshid, dalam jaku pengelalu iya madahka penyulut diayanka lima iku nembiak kolej nya chukup manah sereta ngemantupka ati.
Iya andal 106 iku nembiak ulih nempa pemutus ti menyana dalam peresa SPM taun tu.
Zaki mega nyamin MRSM Betong deka neruska tanggungpengawa sida ngangkatka penyulut pelajar ungkup Menua Betong nengah pengawa ngatur program akademik bekerejasama enggau sekeda sekula ke dipilih di bagi menua nya.
Taun tu sida udah bekerejasama ngatur program akademik enggau enam buah sekula primari sereta kelas embing pulaika pemaik ngagai 100 iku nembiak ba empat buah sekula sekondari, ku iya ngambi chunto, seraya nambah, semua belanja aktiviti nya udah dipelanja Wang Turu Pelajar Mara.
Rambau pengerami nya, Zaki enggau Chairman PIBG, Wilson Entabang udah diberi basa nyuaka setipikit tanda basa enggau perais ngagai bala nembiak ti nyulut dalam akademik, lumba enggau aktiviti ko- kurikulum ke bukai.